मिचिएको भूमि फिर्ता र नयाँ नक्सा, राष्ट्रिय स्वाभिमानको नयाँ उचाइ : केपी ओली
मकालु खबर
काठमाडौं । नेकपा एमालेका अध्यक्ष केपी शर्मा ओलीले आफ्नो नेतृत्वको सरकारले नेपालको राष्ट्रिय स्वाभिमानलाई विश्वस्तरमा माथि उठाएको बताएका छन् । उनले लिम्पियाधुरा, लिपुलेक र कालापानी समेटिएको नयाँ नक्सा जारी गर्नुलाई ऐतिहासिक उपलब्धि भएको बताएका हुन् ।
उनले पहिले आफ्नो भूमि दाबी गर्ने आधार समेत नभएकोमा अहिले नक्सामा राखेर बलियो दाबी प्रस्तुत गरिएको बताए । यसका साथै उनले उत्तरतर्फ चीनसँगका नाकाहरू खोलेर समुद्रसम्मको पहुँच सुनिश्चित गरेको र नेपाल अब ‘ल्यान्ड–लक्ड’ बाट ‘ल्यान्ड–लिङ्क्ड’ देश बनेको बताए । विश्वसँग जोडिने र समुद्रसम्म पुग्ने बाटो चीनतिरबाट पनि खुलेको उनको भनाइ छ । ओलीले राष्ट्रियताको सवालमा एमालेले कहिल्यै सम्झौता नगर्ने र देशको एक इन्च भूमि पनि नछोड्ने प्रतिबद्धता दोहोर्याए । उनले अन्तर्राष्ट्रिय जगत्मा नेपालको आवाज सुनिने गरी आफूले काम गरेको र देशको स्वाभिमान बढेको दाबी गरे ।
उनले भने, ‘हाम्रो भूमि अरूको नक्सामा हुने अवस्था थियो, हामीले वार्ता गर्ने ठाउँ पनि थिएन । हाम्रो भूमि अरूको नक्सामा हुने, हाम्रो नक्सामा नहुने अवस्था थियो । हामीले मिचिएको भूमि फिर्ता ल्याएर आफ्नो नक्सामा राख्यौँ । विश्वसँग जोडिने, समुद्रसँग जोडिने बाटो चीनतिरबाट पनि खुल्यो । नेकपा एमाले काम गर्ने पार्टी हो ।’
आफ्नो कार्यकालमा भएका भौतिक पूर्वाधारका कामहरूको चर्चा गर्दै अध्यक्ष ओलीले नेपाललाई आधुनिक युगमा प्रवेश गराएको दाबी गरे । उनले मेची–महाकाली राजमार्ग चौडा गर्ने कार्य, हुलाकी राजमार्ग र मदन भण्डारी राजमार्गको सुरुवात आफ्नै पहलमा भएको बताए । उनले दमकमा पहिले चापाकल मात्र भएको ठाउँमा अहिले घरघरमा खानेपानी पुगेको र सञ्चार क्षेत्रमा नेपाल विश्वको स्तरमा पुगेको उल्लेख गरे ।
उनले भने, ‘हजारौँ पुलको निर्माण, खानेपानीका ट्याङ्कीहरू र बिजुलीको विस्तारमा हामीले असाधारण काम गरेका छौँ । आज नेपाल संसारमा सञ्चार क्षेत्रमा जहाँ पुगेको छ, त्यही ठाउँमा नेपाल पनि पुगेको छ । संसारका मान्छेले जे प्रयोग गरिरहेका छन्— इन्फर्मेसन टेक्नोलोजी, सूचना सम्बन्धी प्रविधिको क्षेत्रमा, हामीले त्यही प्रयोग गरिरहेका छौँ ।’
सुरुङ मार्ग, रेल मार्ग र भूकम्पपछिको पुनःनिर्माणमा साढे ८ लाख घर बनाएको तथ्य प्रस्तुत गर्दै उनले एमाले काम गर्ने पार्टी भएको र यसले देशको मुहार फेरेको दाबी गरे । उनले एकैपटक ३९६ पालिकामा आधारभूत अस्पतालको शिलान्यास गरेको स्मरण गर्दै स्वास्थ्य क्षेत्रमा पनि ठूलो फड्को मारेको बताए ।
मकालु खबर
