हुम्लामा यो वर्षकै पहिलोपटक हिमपात, बाली सप्रिने आशामा किसान हर्षित

सिमकोट । हुम्लामा यस वर्ष पहिलो पटक हिमपात भएको छ । लामो समयको खडेरी र प्रतीक्षापछि बुधबार (१० माघ) हिमाली जिल्ला हुम्लाको सदरमुकाम सिमकोटसहित आसपासका क्षेत्रमा सिजनकै पहिलो हिमपात भएको हो ।

सामान्यतया मंसिरदेखि नै हिउँले ढाकिने हुम्लामा यसपटक झण्डै दुई महिना ढिलो गरी हिउँ परेको छ । समयमा हिमपात नहुँदा कात्तिकमा छरिएको जेठासी बाली सुक्न थालेपछि चिन्तित बनेका यहाँका कृषकहरूमा भने यो हिमपातले नयाँ उत्साह र खुसी सञ्चार गरेको छ । ‘हिउँ नपर्दा बारीको धुलो उडेर बाली सखाप हुने डर थियो, ढिलै भए पनि हिउँ पर्दा अब भोकमरी नहुने आशा जागेको छ,’ एक कृषकले भने ।

जल तथा मौसम विज्ञान विभागले पहिले नै हिमपातको सम्भावना रहेको पूर्वानुमान सार्वजनिक गरेपछि जिल्ला प्रशासन कार्यालय हुम्लाले सम्भावित जोखिमप्रति सचेत रहन सर्वसाधारणलाई आग्रह गरेको छ । हिमपातसँगै बढेको अत्यधिक चिसोले जनजीवन प्रभावित हुनसक्ने भन्दै प्रशासनले उच्च सतर्कता अपनाउन र सुरक्षित रहन सूचना जारी गरेको हो ।

हुम्लामा मात्र नभई छिमेकी जिल्लाहरू मुगु र जुम्लामा पनि बुधबारदेखि नै हिमपात सुरु भएको छ । हिमपातका कारण ती जिल्लाका उच्च लेकाली क्षेत्रहरूको तापक्रम निकै ओरालो लागेको छ । ढिलो गरी भएको यो हिमपातले एकातिर चिसो बढाएर जनजीवन कष्टकर बनाएको छ भने अर्कोतिर कृषकका लागि भने यो ‘सेतो सुन’ जत्तिकै वरदान सावित भएको छ ।