अब संविधान सभाबाट संविधान बन्ने कल्पना गर्न सकिँदैन: झलनाथ खनाल

काठमाडौँ । नेपाली कम्युनिष्ट पार्टीका नेता एवं पूर्वप्रधानमन्त्री झलनाथ खनालले अब संविधान सभाबाट संविधान बन्ने कल्पना गर्न नसकिने बताएका छन् ।

बुधवार नेपाल राष्ट्रिय अभिभावक संघको २४ औँ स्थापना दिवसको अवसरमा आयोजित कार्यक्रमलाई सम्बोधन गर्दै उनले यस्तो बताएका हुन् ।

उनले २४ घण्टामा भएको जेन–जी प्रदर्शनले देश सखाप बनाएको भन्दै अब २५ वर्ष पछि देश धकेलिएको बताए । उनले जेन–जी प्रदर्शन कसैलाई गर्व लागे पनि वास्तवमा संविधान सखाप बनाउने काम भएको बताए । उनकाअनुसार संविधान तोडफोड गरिएको छ, अब अर्को संविधान सभा बनेर संविधान बन्ने कल्पना पनि गर्न सकिँदैन । नेपाल संवैधानिक हिसाबले अग्रगामी देश भएको बताए ।

उनले भने ‘२४ घण्टाको बीचमा त्यो प्रकारको विध्वंस भयो । त्यो निर्माण गर्न कम्तीमा २५ वर्ष भन्दा अघि निर्माण गर्न सकिँदैन । कसैलाई यो आन्दोलनमा गर्व लाग्छ होला । भयंकर ठुलो, क्रान्ति हो भन्ने लाग्छ होला । तर भएकै संविधान पनि झन्डै झन्डै समाप्त भएको । अलि अलि तोडफोड गरेर बाँकी रहेको छ । संविधानको तोडफोड भयो । सग्लो संविधान त छैन । त्यो संविधान सभाले बनाएको हो । अब अर्को संविधान बनेर अर्को संविधान बन्ने कल्पना पनि गर्न सकिँदैन । अब हुँदैन त्यो । पहिलो पटक संविधान सभाबाट बन्यो । संविधान सभाबाट बनेका संविधान ४२ वटा मात्रै छन् । त्यसअर्थमा नेपाल त संवैधानिक हिसाबले अग्रगामी देश हो । अहिले हामी एउटा अप्ठ्यारो अवस्थाबाट अघि बढ्दै छौँ ।’

नेता खनालले देश अहिले अप्ठ्यारो स्थितिबाट अघि बढिरहेको बताए ।