टी-२० विश्वकप छनोटको पहिलो खेल कुवेतसँग, विजयी लक्ष्यका साथ मैदानमा उत्रँदै नेपाल

काठमाडौं । आईसीसी टी-२० विश्वकप एसिया तथा इस्ट एसिया पेसिफिक रिजनल फाइनलको आफ्नो पहिलो खेलमा नेपालले आज कुवेतको सामना गर्दैछ । ओमानको अल अमेरतस्थित ओमान क्रिकेट एकेडेमी टर्फ १ मा नेपाली समयअनुसार बेलुका ८:४५ बजेदेखि सुरु हुने यो खेल दुवै टोलीका लागि महत्त्वपूर्ण रहेको छ ।

नेपाल र कुवेतबीच टी-२०आई क्रिकेटमा हालसम्म तीन पटक भेट भएको छ, जसमा नेपालले २ खेल जितेको छ भने कुवेतले १ खेल आफ्नो पक्षमा पारेको छ । यसै वर्ष अप्रिलमा हङकङमा भएको चारदेशीय शृंखलामा यी दुई टोली दुईपटक भिडेका थिए । लिग चरणमा नेपाल विजयी भए पनि फाइनलमा भने कुवेतले नेपाललाई हराउँदै बदला लिएको थियो ।

आजको खेल जित्ने टोलीका लागि सुपर सिक्समा स्थान बनाउने सम्भावना लगभग निश्चित हुनेछ । कुवेतले नेपाललाई यसअघि नै हराइसकेकाले नेपाली टोलीले विपक्षीलाई कमजोर आँक्ने गल्ती गर्ने छैन । दुवै टोली उच्च मनोबलका साथ मैदानमा उत्रने अपेक्षा गरिएको छ ।

यस प्रतियोगितामा ९ टोली सहभागी छन्, जसमध्ये ३ टोलीले आगामी वर्ष भारत र श्रीलंकामा संयुक्त रूपमा आयोजना हुने टी-२० विश्वकपमा स्थान बनाउनेछन् । यसपटक टी-२० विश्वकप छनोटको संरचनामा केही परिवर्तन गरिएको छ, जसमा एसिया र इस्ट एसिया पेसिफिक (इएपी) क्षेत्रका टोलीहरूलाई समावेश गरेर ‘टी-२० विश्वकप एसिया एण्ड इएपी छनोट’ नाम दिइएको छ ।

नेपाली टोली: रोहित कुमार पौडेल (कप्तान), दीपेन्द्र सिंह ऐरी (उपकप्तान), कुशल भुर्तेल, लोकेस बम, कुशल मल्ल, आसिफ सेख, आदील आलम, करण केसी, नन्दन यादव, सन्दीप लामिछाने, सन्दीप जोरा, आरिफ सेख, ललित नारायण राजवंशी, गुलशन झा, सोमपाल कामी ।