रवि लामिछानेमाथि प्रहरीले थाल्यो अनुसन्धान, कास्की प्रहरीले गरायो कागज

काठमाडौं । राष्ट्रिय स्वतन्त्र पार्टीका सभापति रवि लामिछानेमाथि सहकारी प्रकरणमा प्रहरीले अनुसन्धान सुरु गरेको छ ।

पोखराको सूर्यदर्शन सहकारीको रकम हिनामिना गरेको आरोपमा लामिछानेमाथि प्रहरीले अनुसन्धान सुरु गरेको हो ।

लामिछानेसहित १८ जना विरुद्धको जाहेरीका आधारमा जिल्ला प्रहरी कार्यालय कास्कीले अनुसन्धान सुरु गरेको हो ।

पोखरा महानगरपालिकाको छानबिन समितिले लामिछानेविरुद्ध दोस्रो पटक प्रतिवेदन र उजुरी दिएको थियो ।

सहकारीको रकम लगानी भएकोबारे अनुसन्धान गर्ने क्रममा लामिछानेसँग पनि कास्की प्रहरीले कागज गराएको स्रोतले जानकारी दियो ।

कास्की प्रहरीले लामिछानेसहित चार जनासँग कागज गराएको हो । स्रोतका अनुसार कागज गराउन जिल्ला प्रहरी कार्यालय कास्कीको टोली नै काठमाडौं आएको थियो । यो टोलीले ग्यालेक्सी टिभीमा पुगेर छापासमेत मारेको खुलेको छ ।