इरानसँगको वार्ता असफल भए कडा सैन्य कारबाही गर्ने ट्रम्पको चेतावनी
मकालु खबर
एजेन्सी । अमेरिकी राष्ट्रपति डोनाल्ड ट्रम्पले इरानसँगको वार्ता असफल भए कडा सैन्य कारबाही गर्ने चेतावनी दिएका छन् ।
वार्ताका लागि अर्को अवसर प्रदान गर्न हाललाई सैन्य आक्रमणको निर्णय स्थगन गरिएको भए पनि संवादबाट निष्कर्ष ननिस्किए पुनः आक्रमण सुरु गर्ने उनले बताएका हुन् ।
अमेरिकी अनलाइन न्युज पोर्टल एक्सियोसलाई दिएको एक अन्तर्वार्तामा राष्ट्रपति ट्रम्पले भने, ‘हामी इरानसँग गम्भीर वार्ताको क्रममा छौं । यदि यसबाट सकारात्मक परिणाम निस्किएन भने हामी पुनः कडा सैन्य कारबाहीमा फर्किनेछौँ ।’
कूटनीतिक समाधानका लागि कति समय दिनुहुन्छ भन्ने प्रश्नमा ट्रम्पले थपे, ‘हामीसँग धेरै समय छैन । यो प्रक्रिया या त छिट्टै टुङ्गिन्छ, नत्र अगाडि बढ्दैन ।’
मध्यस्थकर्ता मुलुकहरू र अन्य क्षेत्रीय साझेदारहरूको आग्रहमा आफूले शुक्रबारका लागि तय गरिएको सैन्य आक्रमण रोकेको ट्रम्पले उल्लेख गरे । उनले अमेरिकी दबाबका कारण इरानी सैन्य शक्ति कमजोर भएपछि मात्र इरान वार्ताका लागि इच्छुक देखिएको दाबीसमेत गरे ।
सञ्चारकर्मीहरूसँग कुरा गर्दै ट्रम्पले भने, ‘हामी राम्रो वार्ता गरिरहेका छौं, हेरौँ के हुन्छ । मलाई लाग्छ केही सकारात्मक नतिजा निस्कने सम्भावना छ । यदि वार्ता सफल भयो भने राम्रो, अन्यथा हामी दुई दिनअघिकै स्थितिमा फर्कनेछौँ ।’
इरानको मुद्दामा अमेरिकी प्रशासन र इजरायली सरकारको धारणा लगभग समान रहेको ट्रम्पको भनाइ छ । यसका साथै, हर्मोज जलसन्धि पार गर्ने क्रममा जहाजहरूमाथि भएको आक्रमणको क्षतिपूर्ति अमेरिकाको नियन्त्रणमा रहेको इरानी सम्पत्तिबाटै असुल गरिने उनले पुनः दोहोर्याए ।
मकालु खबर
