दुई महिनादेखि फोहर नउठ्दा शिवगञ्ज बजारमा समस्या
मकालु खबर
काठमाडौं । झापाको भद्रपुर शिवशताक्षी नगरपालिका–६ स्थित शिवगञ्ज बजारमा करिब दुई महिनादेखि फोहर सङ्कलन हुन नसक्दा स्थानीय व्यवसायी, सर्वसाधारण र उपभोक्ता प्रभावित भएका छन् ।
बजारको विभिन्न स्थानमा फोहर थुप्रिएपछि दुर्गन्ध फैलिनुका साथै सरसफाइमा समस्या देखिएको स्थानीयले बताएका छन् । स्थानीयका अनुसार नगरपालिकाबाट नियमित रूपमा फोहर सङ्कलन हुन नसकेपछि घरघरमा थुप्रिएको फोहर अन्ततः बजार क्षेत्रमा ल्याएर राख्ने गरेका छन् । नियमित सरसफाइ शुल्क बुझाउँदै आए पनि समयमै सेवा नपाएको स्थानीय तेजप्रसाद बिमलिले गुनासो गरे ।
त्यस्तै, यहाँको साप्ताहिक तरकारी बजारमा पशुजन्य फोहरको समेत उचित व्यवस्थापन हुन नसक्दा सरसफाइको चुनौती थपिएको छ । फोहर व्यवस्थापनका लागि उपयुक्त स्थानको अभावले समस्या जटिल बन्दै गएको हो ।
यस विषयमा शिवशताक्षी नगरपालिकाका प्रमुख मेगाहाङ्ग थोप्राले नगरको ‘डम्पिङ साइट’मा स्थानीय अवरोधका कारण केही समयदेखि फोहर व्यवस्थापन प्रभावित भएको बताए । उनले ढुवानीका साधन अन्य अत्यावश्यक काममा व्यस्त रहेकाले तत्काल व्यवस्थापन हुन नसकेको उल्लेख गर्दै शिवगञ्ज बजारको फोहर बिहीबारसम्ममा हटाइने प्रतिबद्धता जनाए ।
नगरप्रमुख थोप्राका अनुसार बिहीबार बिहानदेखि शिवगञ्ज बजारको फोहर सङ्कलन तथा व्यवस्थापनको काम सुरु गरिनेछ । स्थानीयले नियमित फोहर सङ्कलनको व्यवस्था गर्दै दीर्घकालीन र प्रभावकारी फोहर व्यवस्थापन प्रणाली लागू गर्न नगरपालिकासँग माग गरेका छन् ।
मकालु खबर
