इमानदार प्रयास भए पार्टीभित्रको विवाद समाधान गर्न सकिन्छ: प्रकाशशरण महत

काठमाडौँ । नेपाली काँग्रेसका नेता डा. प्रकाशशरण महतले पार्टीभित्रको आन्तरिक विवाद समाधानका लागि नेतृत्व तहमा गम्भीर र इमानदार संवादको आवश्यकता औँल्याएका छन् ।

सोमवार संस्थापन इतर पक्षको बैठकपछि सञ्चारकर्मीहरूसँग आफ्ना धारणा राख्दै नेता महतले बाहिर चर्चाका लागि मात्र नभई वास्तविक निष्कर्ष निकाल्ने उद्देश्यले वार्तामा बस्नुपर्नेमा जोड दिए ।

महतले अहिलेसम्मका वार्ता र छलफलहरू ठोस निष्कर्षमा पुग्न नसकेकोमा असन्तुष्टि व्यक्त गरे । उनकाअनुसार बैठकमा सहमति खोज्ने तर बाहिर निस्किएपछि फरक ढङ्गले प्रस्तुत हुने प्रवृत्तिले एकता प्रक्रियामा अवरोध सिर्जना गरेको छ ।

उनले भने ‘कुन विषयमा सहमति जुट्न सक्छ र कुनमा सक्दैन भन्ने स्पष्ट हुन एकै ठाउँ बसेर छलफल गर्नुपर्छ । मिडिया वा सार्वजनिक खपतका लागि मात्र नभई साँचो मनले सम्मानजनक एकताका लागि वार्ता आवश्यक छ ।’

पार्टी समायोजन र क्रियाशील सदस्यता अद्यावधिकका विषयमा देखिएका मतभेदबारे चर्चा गर्दै डा. महतले ती मुद्दाहरू संवादको माध्यमबाट हल गर्न सकिने दाबी गरे । उनले केवल प्रचारका लागि मात्र एकताको कुरा गरेर कुनै अर्थ नहुने भन्दै गम्भीर भएर वार्ताको टेबुलमा आउन र पार्टीलाई एकढिक्का बनाउन आग्रह गरे ।