तामुटारमा पक्की पुल निर्माण सम्पन्न

भोजपुर । भोजपुरको उत्तरी क्षेत्रमा पर्ने षडानन्द नगरपालिका र साल्पासिलिछो गाउँपालिकालाई जोड्ने तामुटार पक्की पुल निर्माण सम्पन्न भएपछि स्थानीयलाई सहजता भएको छ ।

कोशी प्रदेश सरकार अन्तर्गत पूर्वाधार विकास कार्यालय भोजपुरको रु छ करोड ३३ लाख ५२ हजार ५२६ लागतमा यहाँ पक्की पुल निर्माण सम्पन्न भएको हो । पक्की पुल नहुँदा खोला बढ्दा आवतजावत पूर्ण रूपमा ठप्प हुने गरेको थियो ।

विशेषगरी बिरामीलाई उपचारका लागि लैजान, गर्भवती महिलालाई अस्पताल पुर्याउन, विद्यार्थीलाई विद्यालय पठाउन तथा दैनिक उपभोग्य सामग्री ओसारपसार गर्न निकै कठिनाइ हुने गरेको अवस्था थियो ।

पक्की पुल निर्माण भएपछि दुई वटा स्थानीय तहका नागरिकलाई प्रत्यक्ष लाभ पुगेको स्थानीयवासी तेजबहादुर घलेले बताए । पूर्वाधार विकास कार्यालय भोजपुरका प्रमुख राजनराज रेड्डीले यहाँ ५० मिटर लम्बाइको पक्की पुल निर्माण सम्पन्न भएको जानकारी दिए ।

विसं २०८२ चैत महिनाबाट पुल निर्माण सम्पन्न भएर सञ्चालमा आएको उनको भनाइ छ । यो पुलले षडानन्द नगरपालिका–१ र साल्पासिलिछो गाउँपालिका–३ लाई जोडेको उनले जानकारी दिए ।

“तामुटार पक्की पुल निर्माण सम्पन्न भएर सञ्चालनमा आएको छ”, प्रमुख रेड्डीले भने, “यो पुल दुई वटा पालिकाका नागरिकलाई प्रत्यक्ष लाभ पुगेको छ ।” उनले पुल निर्माणसँगै दुर्गम क्षेत्रमा बसोबास गर्ने नागरिकलाई स्वास्थ्य सेवा, शैक्षिक संस्था, बजार क्षेत्र तथा प्रशासनिक सेवामा पहुँच सहज भएको बताए ।