पाकिस्तानको कराँचीमा आतंककारी आक्रमणः तीन सुरक्षाकर्मीसहित सात जनाको मृत्यु

एजेन्सी । पाकिस्तानको दक्षिणी बन्दरगाह सहर कराँचीस्थित अर्धसैनिक बल रेन्जर्सको मुख्यालयमा भएको आतंककारी आक्रमणमा परी तीन सुरक्षाकर्मी र चार आक्रमणकारीको मृत्यु भएको छ ।

सिन्ध प्रान्तका प्रहरी महानिरीक्षक जाबेद आलम ओधोकाअनुसार स्थानीय समयअनुसार राति करिव ८ः१० बजे कराँचीको गुलिस्तान–ए–जौहर क्षेत्रमा रहेको रेन्जर्सको भवनलाई लक्षित गरी उक्त हमला भएको हो ।

आतंककारीहरूले विस्फोटक पदार्थले भरिएको एक सवारी साधन भवनको मुख्य गेटमा ठोक्काएर आक्रमण शुरु गरेका थिए । आक्रमण लगत्तै सुरक्षा बल र आतंककारीहरूबीच भएको दोहोरो भिडन्तमा चारैजना आतंककारी मारिएका छन् ।

मुख्य गेटमा तैनाथ सुरक्षाकर्मीहरूले तत्काल र प्रभावकारी प्रतिकार गरेका कारण आक्रमणकारीहरू भवनभित्र पूर्ण रूपमा प्रवेश गर्न नपाएको प्रहरीले जनाएको छ ।

घटनापछि सो क्षेत्रमा ठूलो संख्यामा प्रहरी र सुरक्षाकर्मी परिचालन गरिएको छ । हाल उक्त क्षेत्रमा क्लियरेन्स अपरेसन जारी रहेको बताइएको छ ।

सिन्धका मुख्यमन्त्री सैयद मुराद अली शाहले घटनाको निन्दा गर्दै यसमा संलग्न अन्य दोषीहरूलाई कानूनी दायरामा ल्याउन सम्बन्धित अधिकारीहरूलाई निर्देशन दिएका छन् ।