इस्लामावाद समझदारी पत्र : शान्ति र स्थिरता प्रवर्द्धन लक्षित

एजेन्सी । पाकिस्तानी प्रधानमन्त्री शहबाज सरिफले इरानसँग गरिएको इस्लामावाद समझदारी पत्र क्षेत्रीय शान्ति र स्थिरता प्रवद्र्धन गर्ने उद्देश्यले अभिप्रेरित रहेको स्पष्ट पारेका छन् ।

भ्रमणमा रहेका इरानी राष्ट्रपति मसूद पेजेस्कियानसँगको संयुक्त पत्रकार सम्मेलनमा बोल्दै उनले यस सम्झौतामा इरानको ब्यालेस्टिक मिसाइल कार्यक्रम समावेश नभएको बताए ।

प्रधानमन्त्री सरिफले मिसाइल कार्यक्रमको विषय वार्ताको टेबुलमा कहिल्यै नआएको र यो एजेण्डामा समेत नरहेको उल्लेख गरे । सम्झौताका सम्बन्धमा कुनै पनि प्रकारको भ्रम नपाल्न आग्रह गर्दै उनले यो पूर्णतः शान्ति स्थापनामा केन्द्रित रहेको र यसमा मिसाइलसम्बन्धी कुनै प्रावधान नरहेको स्पष्ट पारे ।

इरानी राष्ट्रपतिको स्वागत गर्दै प्रधानमन्त्री सरिफले व्यापार, आर्थिक विकास, पूर्वाधार निर्माण, पुनर्निर्माण र क्षेत्रीय शान्तिका क्षेत्रमा द्विपक्षीय सहयोग विस्तार गर्ने पाकिस्तानको प्रतिबद्धता दोहोर्याए ।

पाकिस्तानको इमानदार र निष्कपट मध्यस्थता प्रयासमा विश्वास गरेकोमा प्रधानमन्त्री सरिफले इरानी नेतृत्वप्रति आभार प्रकट गरे ।

इस्लामावाद समझदारी पत्रको हस्ताक्षरले सम्पूर्ण क्षेत्रलाई नै चपेटामा पार्न सक्ने ठूलो द्वन्द्वलाई टार्न सहयोग पुगेको र यसकै कारण स्विजरल्याण्डको बर्गनस्टोकमा पहिलो चरणको प्राविधिक वार्ता सम्भव भएको उनले बताए ।

हालैको द्वन्द्वमा भएको मानवीय क्षतिप्रति समवेदना व्यक्त गर्दै प्रधानमन्त्री सरिफले राष्ट्रपति पेजेस्कियानको नेतृत्वको प्रशंसा गरे ।

साथै, शान्ति प्रक्रियामा सहयोग पुर्याउने कतार, साउदी अरब, टर्किए र इजिप्टलाई धन्यवाद दिँदै उनले यस प्रक्रियामा पाकिस्तानको सैन्य तथा कुटनीतिक नेतृत्वले पुर्याएको योगदानको समेत कदर गरे ।