हिमालयन बैंक र यूनियन पे बीचको सहकार्यमा आरएमवि कार्ड सेवा शुभारम्भ

काठमाडौँ । हिमालयन बैंक लिमिटेडले  UnionPay RMB कार्ड सञ्चालनमा ल्याएको छ ।

बैंकले र चीनको प्रसिद्ध कार्ड ब्राण्ड यूनियनपेले नेपालमा आफ्ना स्थानीय ग्राहकहरूका लागि चीन भ्रमणलाई सहज तथा सुलभ बनाउनका लागि नेपालमै पहिलो पटक उक्त कार्ड सेवाको सुरुवात गरेको हो ।

सो कार्डको प्रयोगबाट ग्राहक तथा सेवाग्राहीले उत्तरी छिमेकी मुलुक चीन भ्रमण गर्दा त्यहाँका ATM, POS, QR कोड एवं इकमर्श प्लेटफर्म मार्फत हुने कारोबारको चिनियाँ मुद्रा CNY  मा नै सहज भुक्तानी गर्न सक्ने हुँदा बजारमा उपलब्ध अन्य उपकरणहरूको तुलनामा मितव्ययी एवं सर्व स्वीकार्य हुने बैंकले जनाकारी गराएको छ ।

व्यक्तिगत तथा संस्थागत भ्रमण गर्ने विद्यार्थी, व्यवसायी एवं पर्यटक जो कोहीले नेपाल राष्ट्र बैंक विदेशी विनिमय विभाग द्वारा स्वीकृत सीमा सम्मको रकम UnionPay RMB  कार्डमा लोड गरी UnionPay को सञ्जालसँग आबद्ध , Alipay+, WechatPay, Nihao China जस्ता QR  एवं अन्य माध्यम मार्फत समेत CNY मा नै भुक्तानी गर्न सक्नेछन् ।

नक्साल, काठमाडौँ स्थित मेरियट होटलमा आयोजित एक कार्यक्रममा बैंकका तर्फबाट प्रमुख कार्यकारी अधिकृत अशोक शम्शेर राणा तथा UnionPay International का तर्फबाट उपाध्यक्ष ज्वाङ बेइले नेपालमा प्रथम पटक उक्त कार्डसेवाको शुभारम्भ गरे ।