वर्षेखेतीका लागि रासायनिक मलको अभाव हुन्न: कृषिमन्त्री चौधरी

काठमाडौँ । कृषि तथा पशुपंक्षी विकासमन्त्री गीता चौधरीले वर्षे रोपाइँसम्मका लागि रासायनिक मलको समस्या नहुने बताएकी छन् ।

शुक्रवार सिंहदरबारमा बसेको राष्ट्रिय सभा अन्तर्गतको संघीयता सरलीकरण तथा राष्ट्रिय सरोकार समितिको बैठकमा बोल्दै उनले वर्षाको रोपाईंसम्मका लागि रासायनिक मलको भण्डारण रहेको बताएकी हुन् ।

मन्त्री चौधरीले सरकारले माटो बिग्रन नदिनका लागि जैविक तथा प्राङ्गारिक मलको व्यवस्थापनमा जोड दिने नीति लिएको पनि स्पष्ट पारिन् । उनले किसानलाई अनुदान दिने तथा बीउ विजनको उचित व्यवस्थापनका लागि सरकारले सूक्ष्म अध्ययन गरिरहेको पनि बताइन् ।

वास्तविक किसानलाई अनुदान सहायता उपलब्ध गराउने गरी सरकारले सो काम गर्नु परेको मन्त्री चौधरीको भनाई थियो ।

उनले भनिन् ‘रासायनिक मल एकदमै धेरै समस्याग्रस्त अवस्थामा छ भन्ने कुरा देखाइराख्नुभएको छ । हामी यसमा एकदमै धेरै सिरियस्ली लागि राखेका छौँ । प्रत्येक दिन जसो हाम्रो रासायनिक मलको कुरा भइराखेको छ । अहिले रोपाइँ सम्मको लागि हामीसँग मल उपलब्ध छ । हामीले रोपाइँ पछिका लागि मल राख्ने प्रयासमा छौँ । अर्को जैविक तथा प्राङ्गारिक कुरामा चाहिँ सरकारले सय बुँदे सुदृढीकरणको कुरा ल्याएको छ । त्यसमा पनि मलका कुराहरू त्यसमा परेको अवस्था छ । त्यसमा पनि हामी कहीँ नीतिगत कुराहरूमा काम गरिराखेका छौँ । जैविक तथा प्राङ्गारिक मललाई कसरी महत्त्व दिन सकिन्छ त रु अर्को कुरा स्वयल हेल्ड कार्डको कुरा छ । स्वयललाई सुधार गर्नका लागि जैविक तथा प्राङगारिक मलले नै महत्त्वपूर्ण भूमिका खेल्छ । बिउ विजनको आपूर्तिको कुराहरू, किसानहरूलाई प्रोत्साहन गर्ने कुराहरूमा विगतमा दिनमा जसरी भयो । त्यसका सुधारका लागि हामीले सूक्ष्म अध्ययन गरिराखेका छौँ । तर यस वर्षको समस्या समाधान गर्नका लागि हामी त्यसमा काम गरिनै राखेका छौँ ।’

मन्त्री चौधरीले सरकारले उन्नत स्तरको बीउ विजनको आवश्यक व्यवस्था मिलाउने प्रयास पनि गरिरहेको बताइन् ।