राष्ट्रपतिबाट शपथ लिँदै प्रतिनिधिसभाका ज्येष्ठ सदस्य केसी, भोलि २७४ सांसदलाई शपथ खुवाउने

काठमाडौं । राष्ट्रपति रामचन्द्र पौडेलले नवनिर्वाचित प्रतिनिधिसभाका ज्येष्ठ सदस्य अर्जुननरसिंह केसीलाई आज पद तथा गोपनीयताको शपथ गराउँदै छन् । राष्ट्रपतिको कार्यालय शीतल निवासमा बिहान सवा ११ बजेका लागि शपथ ग्रहण समारोहको समय निर्धारण गरिएको छ ।

गत फागुन २१ गते सम्पन्न प्रतिनिधिसभा निर्वाचनमा नेपाली कांग्रेसका तर्फबाट समानुपातिक सांसदमा निर्वाचित केसी हाल ७८ वर्ष पुगेका छन् । उमेरका हिसाबले सबैभन्दा पाका सांसद रहेकाले उनले सुरुमा शपथ लिने अवसर प्राप्त गरेका हुन् ।

आज राष्ट्रपतिबाट शपथ ग्रहण सम्पन्न गरेपछि ज्येष्ठ सदस्य केसीले भोलि (बिहीबार) प्रतिनिधिसभाका बाँकी २७४ जना सदस्यहरूलाई शपथ गराउने कार्यक्रम रहेको छ । यसका साथै, प्रतिनिधिसभाले आफ्नो नयाँ सभामुख प्राप्त नगर्दासम्म संसद् बैठकको अध्यक्षता गर्ने संवैधानिक जिम्मेवारी पनि केसीले नै निर्वाह गर्ने छन् ।

देशको तल्लो सदन अर्थात् प्रतिनिधिसभामा प्रत्यक्ष निर्वाचन प्रणालीबाट १६५ र समानुपातिक निर्वाचन प्रणालीबाट ११० गरी कुल २७५ जना सदस्यहरू निर्वाचित हुने व्यवस्था रहेको छ ।