इन्धनको मूल्यवृद्धिको दबाबका बीच लाओसले विद्यालय सञ्चालनका दिन घटायो
मकालु खबर
काठमाडौं । लाओस सरकारले इन्धनको अस्थिर मूल्यका कारण परिवारहरूमा परेको आर्थिक दबाब कम गर्न देशभरका विद्यालय सञ्चालनमा व्यापक फेरबदलको आदेश दिएको छ । आपत्कालीन उपायअन्तर्गत अब विद्यालयहरू हप्ताको पाँच दिनको सट्टा तीन दिन मात्र सञ्चालन हुनेछन् ।
बिहीबार प्रधानमन्त्री कार्यालयद्वारा जारी सूचनाअनुसार यो निर्देशनले शैक्षिक गुणस्तर कायम राख्दै सिकाइ तालिकामा तत्काल परिवर्तन ल्याएको छ । साथै आर्थिक अवस्था थप बिग्रिएमा अन्य वैकल्पिक उपायहरू पनि अपनाइने सङ्केत गरिएको छ । यो निर्देशन सरकारी र निजी दुवै साधारण शिक्षा संस्थाहरूमा लागू हुनेछ । जसअनुसार भौतिक उपस्थितिमा हुने कक्षाहरू हप्ताको तीन दिनमा सीमित हुनेछन् ।
यद्यपि, विद्यालयहरूले पूर्ण पाठ्यक्रम पूरा गर्नुपर्नेछ र कक्षा समयको अभाव पूर्ति गर्न शैक्षिक पात्रो (एकेडेमिक क्यालेन्डर) लाई थप विस्तार गरिनेछ । यस कदमको मुख्य उद्देश्य शिक्षाको निरन्तरता सुनिश्चित गर्दै परिवारहरूको यातायात खर्चमा कटौती गर्नु रहेको सरकारले जनाएको छ । यदि इन्धनको चाप कायमै रहेमा सरकारले थप कडा कदमहरू चाल्ने योजना पनि अघि सारेको छ ।
पर्याप्त डिजिटल पूर्वाधार भएका संस्थाहरू अनलाइन सिकाइमा जानेछन् भने प्राविधिक रूपमा तयार नभएका विद्यालयहरूलाई अस्थायी रूपमा पठनपाठन बन्द गर्न निर्देशन दिन सकिनेछ । सम्भावित अनलाइन सिकाइलाई सहयोग पुर्याउन प्रविधि तथा सञ्चार मन्त्रालयलाई देशभर इन्टरनेटको विश्वसनीयता र आवश्यक उपकरणहरूको उपलब्धता जाँच गर्ने जिम्मेवारी दिइएको छ ।
सरकारी अधिकारीहरूले आर्थिक राहत र शिक्षामा निर्वाध पहुँचबीच सन्तुलन मिलाउनुपर्ने आवश्यकतामा जोड दिँदै अभिभावक, शिक्षक र विद्यार्थीलाई यो नयाँ व्यवस्था तत्काल कार्यान्वयनका लागि तयार रहन आग्रह गरेका छन् ।
मकालु खबर
