सञ्चारकर्मीहरुलाई पत्रकार महासंघले भन्योः सामाजिक सञ्जालको प्रयोगमा जिम्मेवार बन्नू
मकालु खबर
काठमाडौं । नेपाल पत्रकार महासंघले जिम्मेवार भएर सामाजिक सञ्जाललगायतका विद्युतीय सञ्चार माध्यामहरुको प्रयोग गर्न सञ्चारकर्मीहरुलाई आग्रह गरेको छ ।
महासंघकी अध्यक्ष निर्मला शर्माले जिम्मेवार भएर सामाजिक सञ्जाललगायतका विद्युतीय सञ्चार माध्यमहरुको प्रयोग गर्न सञ्चारकर्मीहरुलाई सचेत गराएकी हुन् ।
सोमवार काठमाडौंमा आयोजित एक कार्यक्रममा बोल्दै उनले पत्रकारहरुले आफ्नो अनुसन्धानको काम नसकिदै सामाजिक सञ्जालहरुमा त्यस्ता विषयहरु सार्वजनिक गरिदिँदा प्रहरीको अपराध अनुसन्धानमा समेत नकारात्मक प्रभाव पर्ने भएकाले त्यसतर्फ सचेत हुनुपर्ने स्पष्ट पारिन् ।
अध्यक्ष शर्माले सञ्चारकर्मीहरुलाई जिम्मेवार भएर सामाजिक सञ्जालहरुको प्रयोग गराउनका लागि महासंघले देशभर सो सम्बन्धि अभियानको सुरुवात गरेको पनि स्मरण गराइन् । ‘अहिले निर्वाचनको बेला मात्रै होइन । हरेक पत्रकारहरुले आफ्नो समाचार कन्टेन्टमा मात्रै होइन, व्यक्तिगत डिजिटल प्लेट फर्ममा पनि हामी जिम्मेवार हुन जरुरी छ । किनभने अहिले युग नै डिजिटल प्लेटफर्महरु छिटो बढी प्रभावित हुने र हेर्ने कारणले गर्दा पत्रकारहरुले पनि आफूले अनुसन्धान गरेको रिर्पोटिङ पूरा नहँदै सोसल कन्टेन्टमा लेख्ने कारणले पनि अपराध अनुसन्धानमा फरक पर्छ होला । त्यसकारण हामीले समाचार बनाउँदै मात्रै होइन, हाम्रा हरेक गतिविधिमा हरेक व्यक्ति सोसल प्लेटफर्म प्रयोग गर्दा जिम्मेवार हुनुपर्छ भनेर पत्रकार महासंघले त्यो खालको अभियान पनि देशभर शुरु गरेको छ’ उनले भनिन् ।
महासंघले प्रहरीको अपराध अनुसन्धानमा सञ्चारकर्मीहरुको सहकार्य अझै घनिभूत बनाउन आवश्यक रहेको पनि बताइन् ।
मकालु खबर
