पश्चिमी वायु सक्रिय : सुदूरपश्चिमदेखि गण्डकीसम्म हिमपात र वर्षाको चेतावनी

काठमाडौं । नेपालमा फेरि पश्चिमी न्यून चापीय प्रणाली सक्रिय भएको छ । यसको प्रभावले आज मंगलबारदेखि देशको पश्चिमी क्षेत्रबाट मौसममा ठूलो बदलाव आउने र सुदूरपश्चिमदेखि गण्डकी प्रदेशसम्म हिमपात र वर्षा हुने मौसम पूर्वानुमान महाशाखाले जनाएको छ ।

मौसमविद् सन्जिव अधिकारीका अनुसार आज मंगलबार दिउँसोदेखि नै सुदूरपश्चिम र कर्णाली प्रदेशका उच्च पहाडी तथा हिमाली क्षेत्रमा हल्का हिमपात र वर्षा सुरु हुनेछ । ‘यो प्रणाली क्रमिक रूपमा पूर्वतिर सर्दै जाने क्रममा आज राति सुदूरपश्चिम, कर्णाली र गण्डकीका केही स्थानमा मध्यम खालको हिमपात र वर्षा हुने सम्भावना छ,’ उनले भने ।

मौसमविदहरूले सुदूरपश्चिमदेखि गण्डकी प्रदेशसम्मका उच्च पहाडी भेगमा मध्यमदेखि भारी हिमपात हुनसक्ने प्रक्षेपण गरेका छन् । लुम्बिनी र सुदूरपश्चिमका तराई तथा पहाडी क्षेत्रका केही स्थानमा भने मेघगर्जन र चट्याङसहित वर्षा हुने सम्भावना छ ।

संघीय राजधानी काठमाडौंमा भने भोलि बुधबार मात्र पानी पर्ने देखिएको छ । बुधबार दिउँसोतिर काठमाडौं उपत्यकामा सामान्य वर्षा हुने र आसपासका उच्च भूभागमा हल्का हिउँ पर्न सक्ने अनुमान गरिएको छ । कोशी र बागमती प्रदेशका हिमाली भेगमा पनि हल्का हिमपातको सम्भावना रहेको मौसमविद् अधिकारीले जानकारी दिए । यो मौसमी प्रणाली धेरै दिन नरहने देखिएको छ । बुधबार रातिदेखि मौसममा क्रमिक सुधार आउने र बिहीबारदेखि देशभरिको आकाश सफा हुने मौसमविद्हरूको भनाइ छ ।

यस वर्षको हिउँद तुलनात्मक रूपमा सुक्खा रहेको छ । जल तथा मौसम विज्ञान विभागले पहिले नै यस वर्ष हिउँदे वर्षा कम हुने प्रक्षेपण गरेको थियो । मौसमविद् मदन सिग्देलका अनुसार जलवायु परिवर्तनका कारण पछिल्ला वर्षहरूमा नेपालमा हिउँदे झरी पर्ने क्रम घट्दै गएको छ । विगतमा चार-पाँच पटकसम्म हुने यस्तो वर्षा अहिले एक-दुई पटकमा सीमित हुन थालेको छ ।