रुसी सेनाले गर्यो युक्रेनका ऊर्जा र सैन्य पूर्वाधारहरूमा आक्रमण
मकालु खबर
काठमाडौं । रुसी रक्षा मन्त्रालयले दिएको जानकारीअनुसार विगत २४ घण्टामा रुसी सेनाले युक्रेनको सैन्य–औद्योगिक परिसर र सैन्य परिचालन क्षेत्रहरूमा सेवा पुर्याउने ऊर्जा सुविधाहरूमा आक्रमण गरेको छ । मन्त्रालयको विज्ञप्तिअनुसार रुसका लामो दुरीका सटीक क्षेप्यास्त्र र आक्रमणकारी ड्रोनहरूले युक्रेनको ड्रोन उत्पादन केन्द्र र सैन्य–औद्योगिक परिसरलाई सहयोग पुर्याउने ऊर्जा संरचनाहरूलाई निशाना बनाएका छन् ।
रुसका रणनीतिक विमान, मिसाइल टोली र आर्टिलरी एकाइहरूले १५७ वटा लक्ष्यहरूमा प्रहार गरेका छन् । जसमा लामो दुरीका ड्रोन भण्डारण स्थल, अपरेटर प्रशिक्षण सुविधाहरू र युक्रेनी सशस्त्र बल तथा विदेशी भाडाका सैनिकहरूको अस्थायी परिचालन केन्द्रहरू समावेश छन् । विज्ञप्तिमा थपिएको छ कि हवाई रक्षा प्रणालीले अमेरिका निर्मित हिमार्स मल्टिपल रकेट लन्च प्रणालीबाट प्रहार गरिएका चारवटा रकेट र १३७ वटा ड्रोनहरूलाई खसालेका छन् ।
युक्रेनी राष्ट्रपति भोलोडिमिर जेलेन्स्कीले शनिबार चारवटा क्षेत्रमा भएको रुसी आक्रमणमा कम्तीमा एक व्यक्तिको मृत्यु भएको र दर्जनौँ घाइते भएको बताए । राजधानी किभ र वरपरको क्षेत्रमा मुख्यतया ऊर्जा सुविधाहरूलाई लक्षित गरिएको उनले टेलिग्राममार्फत जानकारी दिए । किभका मेयर विटाली क्लिट्स्कोले सहरका झण्डै ६,००० अपार्टमेन्ट भवनहरू हिटिङ सेवाबाट वञ्चित भएको र सहरका केही भागमा खानेपानी आपूर्तिमा समेत अवरोध आएको बताए ।
मकालु खबर
