सिन्जो आबेका हत्यारालाई आजीवन काराबास

टोकियो । जापानको एक अदालतले पूर्व प्रधानमन्त्री सिन्जो आबेको गोली हानी हत्या गर्ने अभियुक्त तेत्सुया यामागामीलाई आजीवन काराबासको सजाय सुनाएको छ । बुधबार नारा जिल्ला अदालतले ४५ वर्षीय यामागामीलाई दोषी ठहर गर्दै उक्त फैसला सुनाएको हो ।

सन्२०२२ जुलाई ८ मा जापानको पश्चिमी सहर नारामा चुनावी सभालाई सम्बोधन गरिरहेका बेला यामागामीले घरेलु हतियार (हाते बन्दुक) प्रयोग गरी आबेमाथि गोली प्रहार गरेका थिए । सोही घटनामा ६७ वर्षको उमेरमा आबेको निधन भएको थियो ।

मुद्दाको सुनुवाइका क्रममा सरकारी अभियोजकहरूले यस हत्यालाई ‘दोस्रो विश्वयुद्धपछिको जापानी इतिहासकै एउटा अनपेक्षित र गम्भीर घटना’ को संज्ञा दिएका थिए । समाजमा यसले पारेको गहिरो नकारात्मक प्रभाव र योजनाबद्ध हत्यालाई दृष्टिगत गर्दै उनीहरूले यामागामीलाई आजीवन काराबासको सजाय हुनुपर्ने माग राखेका थिए ।

अर्कोतर्फ, यामागामीका वकिलहरूले उनको काराबास सजाय २० वर्षभन्दा बढी हुन नहुने तर्क गरेका थिए । उनले ‘युनिफिकेसन चर्च’ नामक धार्मिक संस्थाका कारण आफ्नो परिवार बर्बाद भएको र सोही आक्रोशमा हत्या गरेको भन्दै उनको ‘दुःखद बाल्यकाल’ लाई सजाय कम गर्ने आधार बनाउनु पर्ने जिकिर गरेका थिए ।

हत्याको पछाडिको कारण: ‘युनिफिकेसन चर्च’
अदालती बयानका क्रममा यामागामीले युनिफिकेसन चर्चप्रति आफ्नो तीव्र आक्रोश रहेको खुलाएका थिए । उनकी आमाले उक्त संस्थालाई झन्डै १० करोड येन (करिब ६ लाख ३३ हजार डलर) दान दिएपछि उनको परिवार आर्थिक रूपमा टाट पल्टिएको थियो । पूर्व प्रधानमन्त्री आबे उक्त चर्चको राजनीतिक गतिविधिसँग नजिक रहेको विश्वासका आधारमा उनले आबेलाई निशाना बनाएको स्वीकार गरेका थिए ।

यस उच्च-तहको मुद्दाको सुनुवाइ हेर्न सर्वसाधारणको ठूलो भिड लागेको थियो । अदालतको ३१ वटा सिटका लागि बुधबार बिहानै ६८५ जना व्यक्तिहरू गोलाप्रथा (लटरी) मा सहभागी हुन लाइन लागेका थिए ।

आबेको हत्यापछि जापानमा ‘युनिफिकेसन चर्च’ र सत्तारुढ लिबरल डेमोक्रेटिक पार्टी का नेताहरूबीचको सम्बन्धलाई लिएर ठूलो विवाद उत्पन्न भएको थियो । सरकारले गरेको छानबिनपछि टोकियो जिल्ला अदालतले उक्त चर्चको धार्मिक संस्थाको मान्यता खारेज गर्न र कर छुटको सुविधा हटाउन आदेश दिइसकेको छ ।

यस्तै, चन्दा सङ्कलनका नाममा गरिने आर्थिक शोषण रोक्न र पीडितका बालबालिकाको संरक्षणका लागि सन् २०२२ डिसेम्बरमा जापानमा नयाँ कानुन समेत जारी गरिएको छ ।

आबे जापानको इतिहासमा सबैभन्दा लामो समय (२००६–०७ र २०१२–२०२०) प्रधानमन्त्री हुने प्रभावशाली नेता थिए । पदबाट राजीनामा दिएपछि पनि जापानी राजनीतिमा उनको बलियो उपस्थिति रहेको थियो । उनको हत्याले जापानको कडा सुरक्षा व्यवस्था र शान्त राजनीतिक छविमाथि नै प्रश्नचिह्न खडा गरिदिएको थियो ।