जारी विशेष महाधिवेशन नै काँग्रेसको वैधानिक थलो हो : नेता केसी

काठमाडौं । नेपाली काँग्रेसका नेता जगदीश्वरनरसिंह केसीले शेरबहादुर देउवा पक्षले गगनकुमार थापा, विश्वप्रकाश शर्मा र फरमुल्ला मन्सुरलाई कारबाही गर्ने अधिकार नै नराख्ने टिप्पणी गरेका छन् ।

बुधवार विशेष महाधिवेशनस्थल भृकुटीमण्डपमा पत्रकारसँग कुरा गर्दै नेता केसीले विशेष महाधिवेशनको बन्दसत्रबाट कार्यविधि पारित भएकै दिन निवर्तमान केन्द्रिय समिति स्वतः विघटन भइसकेको भन्दै उसले कुनैपनि प्रकारको कारबाही गर्न कानुनी हैसियत नराख्ने टिप्पणी गरे ।

उनले जारी विशेष महाधिवेशन नै पार्टीको वैधानिक थलो भएको दाबी गर्दै सम्पूर्ण निर्णय यही प्रक्रियाअन्तर्गत हुने बताए ।

उनले विशेष महाधिवेशनको हलबाट पार्टीको सभापति तथा अन्य पदाधिकारी घोषणा गरी सभापतिको हस्ताक्षरसहित पदाधिकारीको विवरण निर्वाचन आयोगमा पेस गरिने जानकारी दिए ।

उनले आउँदो निर्वाचनमा काँग्रेस नयाँ नीति र नेतृत्वसहित जनतामाझ जाने स्पष्ट पारे ।