देशको राष्ट्रिय राजनीति विषम परिस्थितिमा छः छविलाल विश्वकर्मा

काठमाडौँ । नेकपा एमाले सचिव छविलाल विश्वकर्माले देशको राष्ट्रिय राजनीतिक विषम परिस्थितिमा रहेको बताएका छन् ।

बुधवार पार्टी केन्द्रीय कार्यालय च्यासलमा आयोजित स्थानीय सरकारका उपत्यकास्तरीय जनप्रतिनिधि भेलालाई सम्बोधन गर्दै उनले यस्तो बताएका हुन् ।

उनले अहिले देशको परिस्थिति सामान्य नरहेको भन्दै असामान्य परिस्थितिका बीचमा पनि एमाले जनताको अधिकार सुरक्षाका लागि सडकमा लडिरहेको बताए । नेपाली जनताले आफ्नो जीवन, रगत, पसिनासँग साटेर ल्याएको र ठुलो त्याग र बलिदानबाट प्राप्त संविधानको रक्षार्थ खटिरहेको बताए ।

अहिले संविधानलाई मुर्छित बनाइएको बताउँदै व्यवस्थाका विरुद्धमा अनेकौँ ढङ्गले चिथोर्ने गतिविधि भइरहेको बताए । एमाले संसद विघटनविरुद्ध अदालतमा जाने पनि बताए ।

उनले भने ‘देशको राष्ट्रिय राजनीति, अहिलेको यो विषम परिस्थिति छ । अहिलेको परिस्थिति सामान्य छैन । यो असामान्य परिस्थितिकाबीचमा नेपाली जनताले आफ्नो जीवन, रगत, पसिनासँग साटेर ल्याएको धेरै ठुलो त्याग र बलिदानबाट प्राप्त यो संविधान, सङ्घीय लोकतान्त्रिक गणतन्त्रात्मक व्यवस्था अहिले यो संविधानलाई मुर्छित पारिएको छ । व्यवस्थाका विरुद्धमा अनेकौँ ढङ्गले चिथोर्ने गतिविधि भएका छन् । यस्तो परिस्थितिमा नेकपा एमाले अध्यक्ष कमरेडको नेतृत्वमा देशभरमा एउटै बुझाइका साथ नेकपा एमाले सडकमा उभिएको छ । असंवैधानिक रूपमा विघटित भएको संसदका सदस्यहरू कानुनी प्रक्रिया अघि बढाउने निष्कर्षमा पुगिसक्नुभएको छ ।’

सचिव विश्वकर्माले एमालेले चलायमान नभएको नेपाली समाज, राजनीतिमा नेकपा एमालेले आम जनताकाबीचमा आफ्ना धारणा अघि सारेर जनतालाई सुसूचित गरेको बताए । एकताबद्ध भएर संविधानको रक्षा र सङ्घीय लोकतान्त्रिक गणतन्त्रात्मक व्यवस्थाको रक्षामा लागेको बताए ।