विशेष अदालत पुग्यो लिचीबारीजग्गा प्रकरण : जग्गाधनी इन्द्र गौचनको पक्षमा स्थानीय

कास्की । पोखराको बाटुलेचौरस्थित लिचीबारी जग्गा प्रकरणमा ७८ लाख रुपैयाँ घुस लेनदेन भएको ठहर गर्दै अख्तियार दुरुपयोग अनुसन्धान आयोगले दुई पूर्वमन्त्रीसहित सात जनाविरुद्ध विशेष अदालतमा मुद्दा दर्ता गरेको छ । पूर्वमन्त्री तथा नेकपा (एमाले)का नेता राजकुमार गुप्ता र पूर्वमन्त्री तथा नागरिक उन्मुक्ति पार्टीकी अध्यक्ष रञ्जिता श्रेष्ठलाई प्रमुख प्रतिवादी बनाएर अख्तियारले ७ जनाविरुद्ध विशेष अदालतमा मुद्दा दायर गरेको हो ।

त्यसैगरी मालपोत कार्यालय कास्कीका तत्कालीन प्रमुख मालपोत अधिकृत रामचन्द्र अधिकारी, बिचौलिया घरजग्गा व्यवसायी सुजन लामा (तामाङ), यामकुमारी गुरुङ, तुल्सीराम बुढा र खेमबहादुर पुनलाई समेत प्रतिवादी बनाइएको छ। सार्वजनिक जग्गा सुकुम्वासीका नाममा निजीकरण गर्न तत्कालीन सामान्य प्रशासनमन्त्री गुप्ता र तत्कालीन भूमि व्यवस्था, सहकारी तथा गरिबी निवारणमन्त्री बलराम अधिकारीले घुस डिल गरेको अडियो टेप बाहिरिएको थियो। पछि चौतर्फी आलोचना भएपछि मन्त्री गुप्ताले पदबाट राजीनामा दिए।

अख्तियारले प्रतिवादी गुप्तासँग ७८ लाख बिगो माग दाबी गरेको छ भने ८ वर्षसम्म जेल सजाय हुनुपर्ने माग समेत गरेको छ। त्यस्तै नागरिक उन्मुक्ति पार्टीकी अध्यक्ष श्रेष्ठलाई समेत सोही बराबरको बिगो र सजाय माग गरेको छ। घुस प्रकरणमा संलग्न बिचौलियाहरूलाई समेत उनीहरूको भूमिकाको आधारमा बिगो तथा सजाय हुनुपर्ने अख्तियारले विषेशमा दायर गरेको मुद्दामा उल्लेख गरिएको छ। पूर्वभूमि व्यवस्था, सहकारी तथा गरिबी निवारणमन्त्री बलराम अधिकारीलाई प्रतिवादी नबनाइए पनि उनीमाथि समेत छुट्टै अनुसन्धान भइरहेको बताइएको छ। उनीमाथि अनुसन्धान भइरहेको र दोस्रो चरणमा उनलाई मुख्य प्रतिवादी बनाएर मुद्दा दायर गर्ने अख्तियारको तयारी छ। स्थानीय बासिन्दा भने लिचीबारीको जग्गाधनी इन्द्र गौचन लगायत रहेको बताउँछन्। इन्द्र गौचन लगायतका पुर्खाले उक्त लिचीबारी किनेर वर्षौंदेखि भोगचलन गर्दै आएकोमा अहिले बिचौलियाले दुःख दिने काम गरिरहेको उनीहरूको भनाइ छ।

एक स्थानीयले भने, ‘लिचीबारीको भोगचलन गौचन गर्दै आउनु भएको हो। म उनकै पक्षमा छु किनभने उनले त्यो जमिन किनेर बसोवास गरेको हो। तर यहाँ बिचौलियाहरूले उनलाई दुःख दिएको जस्तो लाग्छ। पहिले त्यो बारीमा सुन्तला रोपेको थियो। पछि सुन्तलाको राम्रो बजार नभएपछि लिचीको खेती सुरु गरेको हो। घुस काण्डको बारेमा त छानबिन होला म यसबारे केही बोल्न सक्दिन।’

लिचीबारी जग्गा दर्ताको प्रयासमा लागेका बिचौलियाहरू तत्कालीन प्रमुख मालपोत अधिकृत रामचन्द्र अधिकारीलाई मालपोत कार्यालय कास्कीमा लैजान चाहन्थे भने अहिले जग्गाधनी पूर्जा बोकेका कतिपय व्यक्तिहरूले प्रमुख मालपोत अधिकृत चिरञ्जीवी पौडेललाई नै यथावत राख्न चाहन्थे । त्यसक्रममा भएको घुस लेनदेनका अडियो संवादहरू गत साउनमा एकपछि अर्को गर्दै शृंखलाबद्ध रूपमा बाहिरिएका थिए ।