‘रवि फोबिया’को छायामा रास्वपा, जेलबाट भाग्दा क्षति
मकालु खबर
काठमाडौं । रवि लामिछाने नेतृत्वको राष्ट्रिय स्वतन्त्र पार्टी (रास्वपा) यतिबेला आन्तरिक किचलो र नेता कार्यकर्ताहरूको धमाधम बहिर्गमनको भुमरीमा फसेको छ । पार्टी स्थापनाको छोटो समयमै अप्रत्याशित सफलता हासिल गर्दै उदाएको रास्वपा अहिले आफ्नै ‘नेता फोबिया’ र नेतृत्वको कार्यशैलीका कारण विवादमा परेको हो ।
पूर्वमन्त्री सुमना श्रेष्ठले आइतबार पार्टी परित्यागको घोषणा गर्दै दिएको सार्वजनिक वक्तव्यले रास्वपाभित्रको गुम्सिएको असन्तुष्टि छताछुल्ल पारेको छ । सुमनाले भनेकी छन्, ‘जहिलेदेखि राष्ट्रिय स्वतन्त्र पार्टीले देशभन्दा माथि पार्टी र पार्टीभन्दा माथि नेतालाई राख्न थालेको हो, त्यति बेलादेखि नै आलोचना गर्दै आएको हुँ ।’ उनले नेतृत्वको ‘कहिल्यै गल्ती नस्विकार्ने, गल्तीमाथि गल्ती गरिरहने र त्यसको बोझ पार्टीका सबैले बोकिदिनुपर्ने’ प्रवृत्तिको कडा आलोचना गरेकी छन् ।
रवि जेलबाट भाग्दा क्षति
उसो त रविको कारागार बर्हिगमन र त्यसपछिको फिर्ती प्रकरणले पार्टीको आन्तरिक जीवनमा गम्भीर असर पारेको स्पष्ट हुन्छ । पार्टी स्थापनाको अवसरमा ‘रवि लामिछानेमाथि भएको राजनीतिक प्रतिशोध विरुद्ध जनाको हस्ताक्षर’ अभियान चलाएर आन्तरिक रुपमा ऊर्जा प्राप्त गरेको रास्वपालाई पछिल्लो घटनाले भने क्षति पुर्याएको नेता कार्यकर्ताहरुकै निष्कर्ष छ ।
सहकारी ठगी मुद्दामा अदालतको आदेशले कारागार पुगेका लामिछानेलाई राजनीतिक प्रतिशोधको शिकार भन्दै रास्वपाले देशव्यापी हस्ताक्षर अभियान चलाएको थियो । यसले पार्टीको संगठन विस्तार र तल्लो तहसम्म प्रचारमा सहयोग पुगेको थियो। तर, गत सोमबारको जेनजी आन्दोलनका क्रममा नख्खु कारागारमा भएको तोडफोड र लामिछानेको विवादित बर्हिगमनले पार्टीलाई नैतिक संकटमा धकेल्यो ।
लामिछानेलाई स्वागत गर्न कार्यवाहक सभापति डीपी अर्याल कारागार पुगेका थिए । लामिछानेले आफूलाई गृहसचिवको निर्देशनमा रिहा गरिएको भन्दै एक पत्र सार्वजनिक गरेपछि विवाद झन् चर्कियो । मिति केरमेट गरिएको र अस्वभाविक व्यहोरा भएको सो पत्र शंकास्पद देखिएको थियो । यस घटनापछि देशभरका कारागारबाट करिब १३ हजार कैदीबन्दी रिहा भए, जसमध्ये अहिलेसम्म २ हजार मात्र फर्किएका छन् । यसले समाजमा ठूलो आलोचना निम्त्यायो ।
यस प्रकरणले रास्वपाभित्र असन्तुष्टि चुलिएको छ । यसअघि पनि असन्तुष्ट रहेकी सुमनाले पार्टी परित्याग गर्नुको कारण पनि यहि प्रकरण बन्यो । विवेकशील साझाबाट रास्वपामा आएका प्रविण काफ्लेले पनि पार्टी त्याग गरेका छन् । पार्टीभित्र गुटबन्दी र नेतृत्वको गलत कार्यशैलीका कारण आफूले पार्टी छोड्नुपरेको उनको तर्क छ ।
यद्यपि, पार्टी प्रवक्ता मनिष झा भने सभापतिको बर्हिगमन र फिर्तीले पार्टीभित्र क्षति नपुगेको दाबी गर्छन् । उनी भन्छन्, ‘सभापतिले पनि कानुन मान्नुपर्छ तपाईं फर्किनुस् । नागरिकले जुन किसिमले नयाँ पार्टीलाई सोचिरहेका छन् । तपाईंबाट यस्तो अपेक्षा राख्दैनौं भन्दा कसरी रास्वपालाई क्षति हुन्छ र ?’ उनले सुरक्षाका कारण कारागारबाट निस्कनुबाहेक अन्य विकल्प नभएको बताए । सामाजिक सञ्जालमा उक्साउनेहरू रास्वपामा आवद्ध नभएका व्यक्तिहरू उनको जिकिर छ ।
‘रवि फोबिया’को छाया
२०७९ को निर्वाचनमा ‘नो नट अगेन’ को नारा लिएर उदाएको रास्वपाले ११ लाखभन्दा बढी समानुपातिक मत र ७ प्रत्यक्ष सिट जित्दै संघीय संसदको चौथो शक्तिको रूपमा आफूलाई स्थापित गरेको थियो । यसको मुख्य श्रेय रवि लामिछानेको ‘लोकप्रियतावाद’ र उनको अनुहारलाई दिइन्छ । तर, त्यसयता रविकै कारण पार्टी निरन्तर विवादमा मुछिएको छ ।
नागरिकता विवाद, सर्वोच्च अदालतको फैसलापश्चात् अनागरिक बन्न पुगेको अवस्था, त्यसपछिको उपनिर्वाचन, दोहोरो राहदानी प्रकरण र सहकारी ठगी प्रकरणमा मुछिएपछि रास्वपाको छविलाई गम्भीर धक्का पुगेको छ। यी हरेक प्रकरणमा रविले आफ्नो कमजोरी स्विकार्न नचाहेको र पार्टीले पनि उनको बचाउमै शक्ति खर्च गरेको आरोप सुमना श्रेष्ठसहित अन्य असन्तुष्ट नेताहरूको छ । सुमना श्रेष्ठको राजीनामा रास्वपाभित्रको असन्तुष्टिको पछिल्लो कडी मात्र हो ।
श्रेष्ठभन्दा अगाडि रास्वपाबाट को-को बाहिरिए ?
पारस बाहुन : सुदूरपश्चिमका संस्थापक सभापति तथा पूर्वमहामन्त्री ।
भविलाल चापागाईं : बागमती प्रचारप्रसार समितिका उपप्रमुखले ‘तपाईं हामीले सोचेजस्तो रास्वपा छैन है हजुर’ भन्दै असन्तुष्टि पोखेका थिए ।
रमेश खरेल : नेपाल प्रहरीका पूर्व डीआईजी र चर्चित अनुहार । सहकारी प्रकरणमा रवि लामिछाने गृह मन्त्रालय सम्हाल्दा ‘स्वार्थको द्वन्द्व’ प्रष्ट देखिएको भन्दै उनले पार्टी परित्याग गरेका थिए ।
सुमन सुवेदी : प्यूठान संयोजक ।
राजकुमार न्यौपाने : मकवानपुरका संस्थापक अध्यक्ष ।
धर्मेन्द्र सापकोटा : चितवन सभापति ।
हेमन्त बराल : रवि लामिछानेका सीईओ ।
अनिल केशरी शाह : चर्चित बैंकरले पार्टी त्याग नगरे पनि प्रशिक्षण विभागको जिम्मेवारी फिर्ता गरेका छन् ।
डा. अरनिको पाण्डे : केन्द्रीय सदस्यसहित धेरै व्यक्तिहरूले पार्टी परित्याग गरिसकेका छन् ।
यी बहिर्गमन र असन्तुष्टिहरूले रास्वपाको भविष्यमाथि गम्भीर प्रश्नचिह्न खडा गरेको छ । एकातिर पार्टी नेतृत्वले रविको पक्षमा हस्ताक्षर अभियान चलाइरहेको छ भने अर्कोतर्फ नेताहरू धमाधम पार्टी छाडिरहेका छन् । विवाद र बहिर्गमन शृङ्खला चलिरहँदा रास्वपाले आन्तरिक एकता कायम राख्दै आफ्नो लोकप्रियता जोगाउन सक्ला या नसक्ला, यो हेर्न बाँकी नै छ ।
मकालु खबर
