दिल्लीमा बसेर मिर्गौला बेचबिखन गर्दै आएका ७ जनाको गिरोह पक्राउ

काठमाडौं । भारतको नयाँ दिल्लीमा बसेर नेपाली नागरिकको मिर्गौला अवैध रूपमा बेचबिखनमा संलग्न गिरोहका सात सदस्यलाई नेपाल प्रहरीले पक्राउ गरेको छ ।

नेपाल प्रहरीको मानव बेचबिखन अनुसन्धान ब्युरोले आइतबार पत्रकार सम्मेलन गर्दै गिरोहका मुख्य योजनाकारसहित सात जनालाई नियन्त्रणमा लिएको जानकारी दिएको हो ।

गिरोहको मुख्य भूमिका निर्वाह गरिरहेका सिन्धुपाल्चोकका ३८ वर्षीय श्यामकृष्ण भण्डारीलाई कञ्चनपुरको महेन्द्रनगरबाट र उनको सहयोगी २९ वर्षीय सुजन भारतीलाई पर्साको वीरगञ्जबाट पक्राउ गरिएको ब्युरोका प्रमुख प्रहरी वरिष्ठ उपरीक्षक (एसएसपी) कृष्णप्रसाद पंगेनीले जानकारी दिए ।

एसएसपी पंगेनीका अनुसार गिरोहले काठमाडौं, नुवाकोट, काभ्रेपलाञ्चोक, धादिङ, सिन्धुलीलगायतका जिल्लाका सर्वसाधारणलाई पैसाको प्रलोभनमा पारेर भारतको नयाँ दिल्ली पु¥याउने र त्यहाँ गैरकानूनी रूपमा मिर्गौला झिकेर बेच्ने कार्य गर्दै आएको खुलेको छ ।

‘हामीले अपरेशन शिल्ड नामक अभियानमार्फत यो गिरोहको गतिविधि निगरानीमा लिएका थियौं,’ एसएसपी पंगेनीले भने, ‘ती व्यक्तिहरूले गरिब तथा अशिक्षित नेपाली नागरिकलाई निशाना बनाएर मिर्गौला बेच्न फकाउने र दिल्लीमा रहेका अस्पतालहरूमा प्रत्यारोपण गराउने काम गर्दै आएका रहेछन् ।’

यसअघि नै मिर्गौला झिकिएकामध्ये पाँच जनाले जाहेरी दिइसकेको र तीमध्ये धेरैले आफूले केका लागि भारत पु¥याइएको हो भन्ने थाहा नै नभएको प्रारम्भिक बयानमा बताएका छन् । प्रहरीले यस घटनालाई संगठित अपराध ऐन अन्तर्गत मुद्दा दर्ता गर्दै अनुसन्धान अघि बढाएको छ ।

यस ऐनअनुसार मानव अंगको अवैध बेचबिखनमा संलग्न पाइएमा १० वर्षसम्म कैद सजाय र २ लाख रुपैयाँसम्म जरिवाना हुने कानुनी प्रावधान छ ।

पक्राउ परेका भण्डारी सिन्धुपाल्चोकको सुनकोशी गाउँपालिका–७ र भारती इन्द्रावती गाउँपालिका–२ का स्थायी बासिन्दा हुन्। उनीहरू दिल्लीमै बसेर नेपाली एजेन्टमार्फत पीडित खोज्ने, बहलाउनु, भारत पु¥याउने, अस्पतालसम्म लैजाने र मिर्गौला झिकेर बेच्ने कार्यमा संलग्न रहेको प्रहरीले जनाएको छ ।

यसअघि तीन जना प्रतिवादीलाई प्रहरीले पक्राउ गरिसकेको थियो भने पछिल्ला दुई जनासहित पक्राउ संख्या सात पुगेको छ । अनुसन्धानमा थप नाम संलग्न हुन सक्ने भन्दै प्रहरीले अनुसन्धानलाई अझ विस्तार गरेको जनाएको छ ।

प्रहरीले गरिबी र अशिक्षाको फाइदा उठाएर यस्तो संवेदनशील विषयमा ठगी गर्ने गिरोहविरुद्ध कडा कारबाही हुने चेतावनी दिएको छ ।