महदेवा गाउँपालिका पूर्व अध्यक्ष यादवको निधन

राजविराज । सप्तरीको महदेवा गाउँपालिका पूर्व अध्यक्ष दीपककुमार यादवको ६८ वर्षको उमेरमा आज निधन भएको छ ।

महदेवा गाउँपालिका–३, बथनाहा निवासी यादव जनता समाजवादी पार्टी नेपालका केन्द्रीय सल्लाहकार थिए । लामो समयदेखि उहाँ क्यान्सर रोगबाट पीडित थिए ।

चिकित्सकको निगरानीमा उपचाररत रहनुभएका उनको आफ्नै निवासमा निधन भएको जनता समाजवादी पार्टी नेपाल सप्तरीका अध्यक्ष केदारप्रसाद यादवले जानकारी दिए ।

यसैबीच यादवकको निधनप्रति जसपा सप्तरीले गहिरो दुःख व्यक्त गर्दै समवेदना व्यक्त गरेको छ ।

प्रजातान्त्रिक आन्दोलन, जनआन्दोलन र मधेश आन्दोलनमासमेत उहाँले सक्रिय सहभागिता जनाउनु भएको थियो । उहाँका एक छोरा, एक छोरी र पत्नी छन् ।