कंगोमा एडिएफ विद्रोही आक्रमणमा ९ जनाको मृत्यु

एजेन्सी । कङ्गोको पूर्वी प्रजातान्त्रिक गणतन्त्रमा अलाइड डेमोक्रेटिक फोर्सेस (एडिएफ) विद्रोहीहरूलाई जिम्मेवार ठहराइएको पछिल्लो आक्रमणमा नौ जनाको मृत्यु भएको स्थानीय स्रोतहरूले बताएका छन् ।

उत्तरी किभु प्रान्तको बेनी क्षेत्रको ओइचा शहरमा आक्रमण भएको प्रत्यक्षदर्शीहरूले बताएका छन् ।

जहाँ आठ नागरिक र एक प्रहरी अधिकारी घर भित्र फुटबल खेल हेरिरहेका थिए । आक्रमणकारीहरूले भवनलाई घेरेर आगो लगाएको बताइएको छ ।

जसले गर्दा पीडितहरूलाई जिउँदै जलाइएको थियो । त्यतिबेला घर भित्र कति जना थिए भन्ने कुरा स्पष्ट हुन सकेन । बेनीका सैन्य प्रशासक चाल्र्स ओमेओङ्गाले आइतबार घटनास्थलको भ्रमण गरेपछि आक्रमणको निन्दा गर्दै नजिकैको जंगलमा भागेका आक्रमणकारीहरूलाई पछ्याउन थप सेना तैनाथ गरिएको बताए । प्रतिक्रियामा सुरक्षा बैठक भइरहेको स्थानीय अधिकारीहरूले बताएका छन् ।

मध्य अफ्रिकामा इस्लामिक स्टेट संवद्ध र युगाण्डा–मूलको सशस्त्र समूह एडीएफले हालैका हप्ताहरूमा उत्तरी किभु र इटुरी प्रान्तका गाउँहरूमा आक्रमणहरू बढाएको छ ।

बिहीवार राति छिमेकी लुबेरो क्षेत्रमा धेरै एडीएफ आक्रमणहरूमा लगभग ४५ जना मारिएका थिए ।

जुलाईको अन्त्यमा इटुरीमा क्याथोलिक चर्चमा आक्रमणको क्रममा लगभग ४० जना नागरिकहरूको नरसंहार गरिएको थियो ।

नोभेम्बर २०२१ देखि एडीएफ विरुद्ध संयुक्त कंगोली र युगाण्डा सैन्य कारबाहीहरू जारी छन् । तर आक्रमणहरू जारी छन् ।