कांग्रेसको केन्द्रीय कार्यसमिति बैठक आजदेखि

काठमाडौं । प्रमुख प्रतिपक्षी दल नेपाली कांग्रेसको केन्द्रीय कार्यसमिति बैठक आजदेखि पार्टी केन्द्रीय कार्यालय, सानेपामा सुरु हुँदैछ । पार्टीको आन्तरिक जीवनमा देखिएका चुनौतीहरूको सम्बोधन गर्दै सांगठनिक पुनर्जागरण र भविष्यको स्पष्ट मार्गचित्र तय गर्ने महत्त्वपूर्ण कार्यसूचीका साथ बैठक बस्न लागेको हो ।

आइतबार सभापति शेरबहादुर देउवा निवासमा बसेको पदाधिकारी तथा पूर्वपदाधिकारीहरूको बैठकले केन्द्रीय समितिका लागि ६ वटा एजेन्डा तय गरेको छ, जसले पार्टीको धरातलीय यथार्थको समीक्षादेखि निष्क्रिय बनेका भ्रातृसंस्थाहरूलाई गति दिनेसम्मका विषयलाई प्राथमिकतामा राखेको छ ।

बैठकको मुख्य एजेन्डाका रूपमा पार्टीले हालै सञ्चालन गरेको १०० दिने अभियानको समीक्षालाई राखिएको छ । यस अभियानअन्तर्गत जिल्ला-जिल्लामा खटिएका केन्द्रीय प्रतिनिधिहरूले तयार पारेको प्रतिवेदनमाथि बैठकमा गहन छलफल हुनेछ । पार्टीका मुख्यसचिव कृष्णप्रसाद पौडेलका अनुसार, ‘यो प्रतिवेदनले पार्टीको वास्तविक सांगठनिक अवस्था, कार्यकर्ताको मनोबल र जनताको अपेक्षालाई उजागर गर्नेछ । यही प्रतिवेदनको निष्कर्षका आधारमा पार्टीले आगामी दिनका लागि रणनीतिक कार्यदिशा तय गर्नेछ ।’

बैठकको अर्को महत्त्वपूर्ण एजेन्डा लामो समयदेखि निष्क्रिय रहेका भ्रातृसंस्थाहरूको भविष्य निर्धारण गर्नु हो । म्याद सकिएका ७ वटा भ्रातृसंस्थाहरूको तदर्थ समितिलाई महाधिवेशन सम्पन्न गर्नका लागि अन्तिम पटक म्याद थप गर्ने तयारी छ । तर, यस पटक पार्टीले कडा नीति अख्तियार गरेको छ । तोकिएको समयभित्र महाधिवेशन गर्न नसके ती समितिहरू स्वतः विघटन हुनेछन् । अब तदर्थ समितिहरूले नभई, पार्टीले नै गठन गरेको निर्देशन समितिले महाधिवेशनको कार्यतालिका बनाएर कार्यान्वयन गराउनेछ, जसले भ्रातृसंस्थाहरूको सुस्तता अन्त्य गर्ने अपेक्षा गरिएको छ ।

महामन्त्री गगन थापा नेतृत्वको क्रियाशील सदस्यता व्यवस्थापन समितिले असार मसान्तसम्म तोकेको नवीकरणको समयसीमा र नयाँ सदस्यता वितरणको रणनीतिबारे पनि बैठकमा छलफल हुनेछ । पार्टीको जीवन्तताका लागि मेरुदण्ड मानिने क्रियाशील सदस्यतालाई व्यवस्थित गर्नुलाई कांग्रेसले प्राथमिकतामा राखेको छ ।

यसैगरी, विदेशस्थित जनसम्पर्क समितिहरूमा पनि अब क्रियाशील सदस्यता दिने व्यवस्था गर्न विधान परिमार्जनको प्रक्रिया अघि बढाउने एजेन्डा तय भएको छ । हालसम्म साधारण सदस्य मात्र रहने व्यवस्थालाई परिवर्तन गरी प्रवासी नेपालीहरूलाई पार्टीसँग थप गहिरो गरी जोड्ने प्रयासस्वरूप यो प्रस्ताव ल्याइएको हो । बैठकमा पार्टीको केन्द्रीय नीति तथा प्रशिक्षण प्रतिष्ठानले प्रकाशन गर्न लागेको स्मारिका र समसामयिक राजनीतिक परिस्थितिबारे पनि विस्तृत छलफल हुनेछ ।