ओलीको निर्देशन– ‘मिसन ०८४ भुल्नै हुँदैन, योजनाबद्ध ढंगले अघि बढ्नुस्’

काठमाडौं । प्रधानमन्त्री तथा नेकपा एमालेका अध्यक्ष केपी शर्मा ओलीले पार्टीको आगामी लक्ष्य ‘मिशन ०८४’ लाई केन्द्रमा राखेर अघि बढ्न निर्देशन दिएका छन् ।

सोमबार ललितपुरमा सम्पन्न राष्ट्रिय युवा संघ नेपालको केन्द्रिय कमिटीको पूर्ण बैठकलाई सम्बोधन गर्दै अध्यक्ष ओलीले युवालाई योजनावद्ध ढंगले काममा जुट्न आग्रह गरे ।

‘युवाको हकहित, रोजगारी, उद्यमशिलता लगायतका थुप्रै मुद्दा छन्,’ ओलीले भने, ‘तर, यी सबैसँगै मुख्य कुरा हो—मिशन ०८४ । यदि हामीले यही कुरा भुल्यौँ भने बाँकी सबै कुरा भुलिन्छ ।’

प्रधानमन्त्री ओलीले मिशन ०८४ का लागि संगठनभित्र एकता आवश्यक रहेको स्पष्ट पार्दै पार्टी र आन्दोलन दुबैमा अनुशासन र समर्पण जरुरी रहेको बताए ।

‘कुनै प्रकारको विकृत कुराबाट विचलित नहुनुस्,’ उहाँले भने, ‘पार्टीको मूल सन्देश यही हो। सबै कुरा संयोजन गरेर अघि बढ्न सक्नु नै सफलता हो ।’

अध्यक्ष ओलीले युवाहरूलाई इनोभेटिभ बन्न पनि सुझाव दिए । ‘सही ढंगले नेतृत्व गर्न सक्ने प्रतिको असहिष्णुता गलत हो,’ उनले भने, ‘विश्वका धेरै इनोभेटिभ कार्यहरू युवाहरूबाटै आएका छन्। त्यसैले आफैँमा दक्षता र उपलब्धिको भावना विकास गर्नुपर्छ ।’

नेकपा एमालेले २०८४ सालको आम निर्वाचनलाई लक्ष्य बनाएर ‘मिशन ०८४’ अभियान चलाएको छ ।