इरानको नातान्ज आणविक केन्द्रमा इजरायली आक्रमण
मकालु खबर
काठमाडौं । इजरायलले इरानको सबैभन्दा ठूलो आणविक स्थलगत केन्द्र नातान्जमा लक्षित हवाई आक्रमण गरेको छ । अन्तर्राष्ट्रिय सञ्चारमाध्यमहरूले जनाएअनुसार इस्फाहान प्रान्तस्थित उक्त केन्द्रमा शुक्रबार बिहान गरिएको आक्रमणले संरचनात्मक क्षति पुर्याउनुका साथै त्यहाँ रहेका प्रयोगशाला र विद्युत प्रणाली गम्भीर रूपमा प्रभावित भएका छन् ।
नातान्ज केन्द्र इरानको प्रमुख युरेनियम समृद्धिकरण स्थल हो, जहाँ हालसम्म ६० प्रतिशतसम्म समृद्ध युरेनियम उत्पादन हुँदै आएको थियो । युरेनियम ग्यासलाई उच्चस्तरमा प्रशोधन गरी यसलाई आणविक इन्धन तथा हतियार निर्माणका लागि प्रयोग गरिन्छ । प्राप्त विवरणअनुसार, आक्रमणपछि करिब १,५०० सेंट्रिफ्यूज नष्ट भएका छन् ।
घटनास्थलको सुरक्षा मूल्याङ्कन जारी रहे पनि प्रारम्भिक विवरणहरूले केही संरचनात्मक भागहरूमा क्षति पुगेको र वैज्ञानिक तथा प्राविधिकलाई सुरक्षित स्थानमा सारिएको जनाएका छन् । मानवीय क्षति न्यून रहेको बताइएको छ । आक्रमणमा एकजना वरिष्ठ इरानी आणविक वैज्ञानिकको मृत्यु भएको पुष्टि गरिएको छ । इरानी सुरक्षास्रोतहरूले यद्यपि विस्तृत विवरण सार्वजनिक गरिसकेका छैनन् ।
इजरायलले यसअघि शनिबार नातान्जस्थित एक प्रमुख तेल भण्डारण केन्द्रमाथि समेत आक्रमण गरेको थियो । त्यसको जवाफस्वरूप इरानले सोमबार इजरायलको सबैभन्दा ठूलो तेल प्रशोधन क्षेत्रमा क्षेप्यास्त्र प्रहार गरेको दाबी गरिएको छ ।
यस घटनालाई अन्तर्राष्ट्रिय आणविक ऊर्जा संस्थाले गम्भीर रूपमा लिई निकट निगरानी गरिरहेको जनाएको छ । रणनीतिक दृष्टिले अत्यन्त संवेदनशील मानिने नातान्ज केन्द्रमा आक्रमण हुनु भनेको विश्व आणविक स्थायित्वमै गहिरो असर पर्ने सम्भावना हो ।
इरान-इजरायलबीचको तनाव पाँचौं दिनमा प्रवेश गरिसकेको छ। हालसम्म इरानमा २२४ जनाको मृत्यु भइसकेको छ भने एक हजारभन्दा बढी घाइते भएका छन् । इसराइली पक्षमा पनि २४ जनाको मृत्यु र सयौं घाइते भएको जनाइएको छ । दुवै पक्षबाट सशक्त प्रतिआक्रमण भइरहँदा क्षेत्रीय सुरक्षामा गम्भीर प्रश्न खडा भएको छ ।
मकालु खबर
