रातो सुनको खेतीमा रमाउँदै रवाण्डाका किसान

रवाण्डा । रवाण्डाको पूर्वी प्रान्तस्थित गाशोरा फार्मले आजभोलि खुर्सानी मात्र उत्पादन गरिरहेको छैन, यसले कृषिमा रुपान्तरण र दुई महादेशबीचको सफल सहकार्यको एक प्रेरणादायी कथा पनि लेखिरहेको छ ।

अफ्रिकी माटोमा फलेको पिरो खुर्सानीले आज चीनको विशाल बजारमा आफ्नो स्वाद र स्थान दुवै बनाउन सफल भएको छ, जुन चीन-अफ्रिका आर्थिक साझेदारीको एक उत्कृष्ट नमुना हो । यो सफल यात्राको बीजारोपण सन् २०१८ मा भएको थियो, जब फार्मका प्रबन्ध निर्देशक डियुडोने ट्वाहिरवाले शाङ्घाईमा आयोजित ‘चीन अन्तर्राष्ट्रिय आयात एक्स्पो’मा सहभागिता जनाए । त्यसको एक वर्षपछि ‘चीन-अफ्रिका आर्थिक तथा व्यापार एक्स्पो’मा उनको सहभागिताले चिनियाँ बजारमा प्रवेश गर्ने उनको आत्मविश्वासलाई थप बलियो बनायो ।

ती प्रयासहरूले सन् २०२४ मा ठोस आकार लिए, जब किगालीस्थित गाशोरा फार्मले चिनियाँ कम्पनी हगलबलको सहायक कम्पनीसँग मिलेर “रवाण्डा-हुनान मरिच उद्योग प्रदर्शन परियोजना” सुरु गर्‍यो । ‘ठेक्का खेती’को मोडलमा आधारित यो परियोजना १०० हेक्टर क्षेत्रफलमा फैलिएको छ, जसले बिरुवा खेतीदेखि प्रशोधन र निर्यातसम्मको सम्पूर्ण मूल्य शृङ्खलालाई समेट्छ ।

साझेदारीको परिणाम तत्कालै उत्साहजनक देखियो । सम्झौता पछिको पहिलो सिजनमा नै २०० टन सुकेको खुर्सानी सफलतापूर्वक चीन निर्यात गरिएको छ । रवाण्डाको यो उत्पादनले चिनियाँ थोक बजार हुँदै त्यहाँका उपभोक्ताहरूको भान्सासम्म आफ्नो पहुँच बनाएको छ र सकारात्मक प्रतिक्रिया पाइरहेको छ ।

आगामी जुन १२ देखि १५ सम्म चीनको हुनान प्रान्तको राजधानी चाङ्सामा चौथो ‘चीन-अफ्रिका आर्थिक तथा व्यापार एक्स्पो’ आयोजना हुँदैछ । यस एक्स्पोले अफ्रिकी र चिनियाँ सरोकारवालाहरूबीच नयाँ साझेदारीको ढोका खोल्ने र गाशोरा फार्मजस्ता सफलताका कथाहरूलाई विश्वसामु प्रदर्शन गर्ने अपेक्षा गरिएको छ ।