विराट कोहलीले लिए टेस्ट क्रिकेटबाट सन्न्यास

काठमाडौं । भारतले इङ्ल्यान्ड भ्रमणका लागि आफ्नो टोली घोषणा गर्नुभन्दा केही दिनअघि महान ब्याट्सम्यान विराट कोहलीले सोमबार टेस्ट क्रिकेटबाट तत्काल सन्न्यासको घोषणा गरेका छन् ।

एक सय २३ खेलमा ४६ दशमलव ८५ को औसतमा नौ हजार दुई सय ३० रन बनाएका कोहलीले भारतीय कप्तान रोहित शर्माले आफ्नो टेस्ट करियर समाप्त गरेको पाँच दिनपछि इन्स्टाग्राममा यो निर्णय पोस्ट गरेका हुन् ।

सन् २०११ मा पदार्पण गरेदेखि कोहलीले ३० शतक र ३१ अर्धशतक बनाए । उनको उच्चतम स्कोर २५४ नटआउट थियो ।

“टेस्ट क्रिकेटमा मैले पहिलो पटक ब्यागी ब्लु लगाएको १४ वर्ष भयो”, २७ करोड १० लाख फलोअर्स भएको आफ्नो इन्स्टाग्रामको आधिकारिक फिडमा पोस्ट गर्दै ३६ वर्षीय कोहलीले भने “इमान्दारीपूर्वक, मैले कहिल्यै कल्पना गरेको थिइनँ कि यो प्रारूपले मलाई कस्तो यात्रामा लैजानेछ । यसले मलाई परीक्षा ग¥यो, मलाई आकार दियो र मलाई जीवनभरि लिएर हिँड्ने पाठहरू सिकायो, जसै म यो प्रारूपबाट टाढा जाँदैछु, यो सजिलो छैन –– तर यो सही लाग्छ । मैले यसलाई मेरो सबै कुरा दिएँ र यसले मलाई मैले आशा गरेको भन्दा धेरै बढी फिर्ता दिएको छ ।”

एक प्रेरणादायी व्यक्तित्व कोहली सन् २०२२ मा यस भूमिकाबाट अलग हुनुअघि ६८ खेलमा ४० जित र १७ हारका साथ भारतका सबैभन्दा सफल टेस्ट कप्तान थिए ।

त्यसपछि ६० खेलमा २७ जितका साथ महेन्द्र सिंह धोनी र ४९ खेलमा २१ जितका साथ सौरभ गाङ्गुली थिए ।

“खेलप्रति मैले मैदानमा साझा गरेका मानिसहरूप्रति र बाटोमा मलाई देखिएको महसुस गराउने हरेक व्यक्तिप्रति म कृतज्ञताले भरिएको हृदयले बिदा लिँदैछु”, उनले भने “म सधैँ मेरो टेस्ट करियरलाई मुस्कानका साथ फर्केर हेर्नेछु ।”

पाँच दिवसीय खेलमा कोहलीको फर्मको कमी उनको सन्न्यास लिने निर्णय गरेको हुन सक्छ ।

सन् २०११ देखि २०१९ को बीचमा उनको औसत ५५ नजिक पुगेको थियो भने पछिल्लो २४ महिनामा यो सङ्ख्या घटेर ३२ दशमलव ५६ मा झरेको छ ।

कोहलीको अन्तिम टेस्ट जनवरीमा सिड्नीमा भएको थियो । उक्त टेस्टमा भारत पराजित भएको थियो र यससँगै अस्ट्रेलियासँग ३–१ ले शृङ्खला हारेको थियो ।

पर्थमा भएको पहिलो टेस्टको दोस्रो इनिङ्समा अपराजित शतक बाहेक कोहलीले पाँच टेस्टको शृङ्खलामा आठ पारीमा ९० रन मात्र बनाउन सक्नुभयो ।

छत्तिस वर्षीय कोहली अस्ट्रेलियाका स्टिभ स्मिथ, न्युजिल्यान्डका केन विलियम्सन र इङ्गल्यान्डका जो रुटसँगै पछिल्लो एक दशकमा टेस्ट क्रिकेटमा प्रभुत्व जमाउने महान ब्याट्सम्यानहरूको ‘फ्याब फोर’ चौकडीको हिस्सा थिए ।

‘किङ्ग कोहली’ उपनामले चिनिने उनि तीनवटा अन्तर्राष्ट्रिय ढाँचामा भारतको ब्याटिङको मेरुदण्ड थिए र गत वर्ष बार्बाडोसमा आफ्नो टोलीको विश्वकप फाइनल जितमा म्याच जित्ने पारीका साथ आफ्नो टि–२० करियरको अन्त्य गरेका थिए ।

त्यसपछि कोहलीले रोहितसँगै सबैभन्दा छोटो प्रारूपबाट बिदा लिए ।

सन्न्यासको घोषणा गर्दै उनले लेखेका छन्–

१४ वर्ष भयो मैले टेस्ट क्रिकेटमा पहिलोपटक निलो झुलो लगाएको। साँच्चै भन्नुपर्दा, यो ढाँचाले मलाई कस्तो यात्रा गराउँछ भन्ने मैले कहिल्यै कल्पना गरेको थिइनँ। यसले मलाई परिक्षण गर्‍यो, बनायो, अनि जीवनभर साथ रहने पाठहरू सिकायो।

सेतो पोशाकमा खेल्नु एकदमै व्यक्तिगत अनुभवजस्तो लाग्छ। शान्त संघर्ष, लामो दिनहरू, र ती साना पलहरू — जुन कसैले देख्दैन तर तिनीहरू सधैं मनमा रहन्छन्।

अब जब म यो ढाँचाबाट टाढा हुँदैछु, सजिलो त छैन —तर सहि समय जस्तो लाग्छ। मैले यसलाई जति सक्दो दिएँ, र यसले मलाई मैले कल्पना गरेकोभन्दा धेरै दिएर गयो।

म कृतज्ञता भरिएको मन लिएर अगाडि बढ्दैछु — यो खेलका लागि, ती साथीहरूका लागि जससँग म मैदानमा थिएँ, र ती सबैका लागि जसले मलाई यो यात्रामा देखे र महसुस गराए।

म सधैं आफ्नो टेस्ट करियरलाई मुस्कानका साथ सम्झिरहनेछु।