प्रिसा शाहको मृत्युप्रति दुःखी छौं, घटनाको अनुसन्धान हुँदैछ : भारतीय विदेश मन्त्रालय
मकालु खबर
काठमाडौं । भारतीय विदेश मन्त्रालयले भारतको उडिसा राज्यस्थित क्यालिङ्गा इन्स्टिच्युट अफ इन्डस्ट्रियल टेक्नोलोजीमा अध्ययनरत नेपाली विद्यार्थी प्रिसा शाहको मृत्युप्रति दुःख व्यक्त गरेको छ ।
भारतीय विदेश मन्त्रालयले शुक्रवार प्रेस विज्ञप्ति जारी गर्दै प्रिसाको मृत्युमा गहिरो दुःखी भएको बताउँदै शोकसन्तप्त परिवारजनमा हार्दिक समवेदना प्रकट गरेको छ ।
मन्त्रालयले घटनाको बारेमा जानकारी भएदेखि ओडिशा राज्य सरकारसँग निरन्तर सम्पर्कमा रहेको बताएको छ । ओडिशा राज्य सरकारले मृतकको परिवारलाई पूर्ण सहयोग गरेको र हाल ओडिशा पुलिसद्वारा विस्तृत अनुसन्धान भइरहेको मन्त्रालयले जनाएको छ ।
भारत सरकारले सबै अन्तर्राष्ट्रिय विद्यार्थीहरूको सुरक्षा, सुरक्षा र कल्याणलाई धेरै गम्भीरताका साथ लिएको मन्त्रालयले जनाएको छ ।
केआईआईटीमा स्नातक तह पहिलो वर्षमा अध्ययनरत १८ वर्षीया नेपाली छात्रा प्रिसा शाहको हिजो राती मृत्यु भएको थियो ।
उक्त विश्वविद्यालयमै यसअघि पनि यस्तै दुःखद घटना घटिसकेको छ । गत ४ फागुनमा नेपाली विद्यार्थी प्रकृति लम्साल पनि सोही होस्टेलमा मृत अवस्थामा फेला परेकी थिइन् ।
मकालु खबर
