सङ्घीय सरकारबाट प्रदेशलाई प्राप्त हुने अनुदान कटौती हुँदै जानु चिन्ताको विषय : मुख्यमन्त्री कार्की

विराटनगर । कोशी प्रदेशका मुख्यमन्त्री हिक्मतकुमार कार्कीले योजना बैंकले प्रदेश सरकारलाई बजेट निर्माण गर्न सहयोग पुग्ने बताएका छन् ।

कोशी प्रदेश योजना आयोगद्वारा आयोजित ‘कोशी प्रदेश स्तरीय आयोजना तर्जुमा सम्बन्धी अन्तरक्रिया’को बुधबार उद्घाटन गर्दै उनले योजना बैंकको अवधारणले योजना समावेश व्यवस्थित भइ योजनाहरुको असन्तुलन घट्ने विश्वास व्यक्त गरे ।

मुख्यमन्त्री कार्कीले भने “प्रदेश सरकारको स्रोतसँगै बैंकको योजना पनि घटबढ भइरहन्छ ।” उहाँले रु ५० लाख भन्दा कमको योजना बैंकमा समावेश नगर्न कोशी प्रदेश सभाका सदस्यहरुलाई आग्रह गरे । कोशी प्रदेश सरकार र स्वीस सरकारको संयुक्त लगानीमा प्रदेशमा चार वटा पदमार्ग निर्माण हुने जानकारी उनले दिए ।

मुख्यमन्त्री कार्कीले सङ्घीय सरकारबाट प्रदेश सरकारलाई प्राप्त हुने अनुदान कटौती हुँदै जानु चिन्ताको विषय भएको उल्लेख गर्दै सरकार आन्तरिक आय बढाउन सम्भावित क्षेत्रमा लगानी गर्न तयार रहेको बताए ।

आर्थिक मामिला तथा योजनामन्त्री रामबहादुर मगरले पर्यटनको नाममा जथाभावी खर्च गर्ने बानी हटाउनुपर्ने बताउँदै चोर बाटोबाट योजना समावेश नहोस् भनी योजना बैंकको व्यवस्था गरेको जानकारी दिए।

कोशी प्रदेश सभाका सभामुख अम्बरबहादुर विष्टले आय आर्जन गर्न सकिने क्षेत्रमा लगानी गर्न प्रदेश सरकारलाई आग्रह गरे । सो कार्यक्रममा आयोगका सचिव मिमाँस अधिकारीले प्रदेश आयोजना बैंक व्यवस्थापन २०८१ को कार्यविधि सम्बन्धी र आर्थिक मामिला तथा योजना मन्त्रालयका सचिव शंकर नेपालले प्रदेश स्तरीय आयोजनाको पहिचान तथा आयोजना तर्जुमा गोष्ठीका विषयमा कार्यपत्र प्रस्तुत गरेका थिए ।

प्रस्तुत कार्यपत्रमा कोशी प्रदेश सभाका सदस्यहरु होमबहादुर थापा, रामप्रसाद महतो, प्रदीपकुमार सुनुवार, मैया श्रेष्ठ, गोम्बु शेर्पा, तिलकुमार मेन्याङ्बो, गीतादेवी रेग्मी, सपना दर्जी, राजन किराती, नारायणबहादुर मगर, रामदेव यादव, शोभा चेम्जोङ्ग, सम्झना तामाङ्ग, गोपालबहादुर विश्वकर्मा, निरन राई, खिनु लङ्वा लिम्बू, विदुर लिङ्थेप, निर्मला तावा लिम्बू र कमल जवेगुले आआफ्नो धारणा सहित सुझाव दिएका थिए ।