टायर पञ्चर हुँदा माइक्रो दुर्घटना : एक जनाको मृत्यु, १२ घाइते
मकालु खबर
काठमाडौं । सिन्धुलीको सुनकोशी गाउँपालिका-६, कानढुंग्रेमा भएको माइक्रोबस दुर्घटनामा एकजनाको मृत्यु भएको छ भने १२ जना घाइते भएका छन् । काठमाडौँबाट जनकपुरतर्फ जाँदै गरेको बा ३ ख ८४४५ नम्बरको हायस माइक्रोबस बिहीबार साँझ दुर्घटनामा परेको हो ।
दुर्घटनामा परि धनुषाको जनकपुर उपमहानगरपालिका-१० निवासी ५० वर्षीय निर्मल गुप्ताको मृत्यु भएको छ । गुप्ताको उपचारका क्रममा धुलिखेल अस्पतालमा निधन भएको जिल्ला प्रहरी कार्यालय सिन्धुलीका प्रवक्ता डीएसपी अनिलकुमार खड्काले जानकारी दिए । दुर्घटना बिहीबार साँझ करिब साढे पाँच बजे माइक्रोबसको पछाडिको टायर पञ्चर भएपछि भएको थियो ।
अनियन्त्रित अवस्थामा रहेको सवारी साधन सडक छेउको डिभाइडरमा ठोक्किएर दुर्घटनाग्रस्त भएको थियो । दुर्घटनामा घाइते भएका १२ यात्रुमध्ये ६ जनाको उपचार धुलिखेल अस्पतालमा भइरहेको छ । बाँकी ६ जनालाई थप उपचारका लागि काठमाडौं पठाइएको प्रहरीले जनाएको छ ।
प्रहरीका अनुसार सवारी दुर्घटनाको कारणको थप अनुसन्धान भइरहेको छ ।
मकालु खबर
