मकवानपुरबाट आएकी थिइन् ग्वार्कोको गेष्टहाउसमा मृत भेटिएकी युवती

काठमाडौं । ललितपुरको ग्वार्कोस्थित गेष्ट हाउसमा बास बसेकी एक युवतीको मृत्यु भएको छ । ललितपुर महानगरपालिका–७ ग्वार्कोमा रहेको सनलाइट गेष्टहाउसमा एक युवकसँग राती ८ बजे आएकी युवतीको बिहान मृत्यु भएको हो ।

ललितपुरकै डुकुछाप घर भएर हाल सातदोबाटोमा बस्दै आएका एक युवकले राति साथमा लिएर आएको युवती बिहानीपख बेहोस भएकी थिइन् । युवती बेहोस भएपछि गेष्ट हाउस संचालकले बि एण्ड बि अस्पतालमा लगेकोमा उपचारकै क्रममा बिहान मृत्यु भएको प्रहरीले जनाएको छ ।

युवकले पनि सास फेर्न कठिनाइ भएको भनी जनाएपछि प्रहरीको निगरानीमा बि एन्ड बि अस्पतालमा नै उपचार भइरहेको छ । घटनाको सम्बन्धमा थप अनुसन्धान सुरु गरिएको छ ।

प्रहरी परिसर ललितपुरका प्रमुख एसएसपी शेखर खनालकाअनुसार मृतक युवती तीन दिनअघि मकवानपुरबाट काठमाडौं आएकी थिइन् । काठमाडौं आफन्तकोमा आएको र हिजोमात्रै साथीलाई भेट्न जान्छु भन्दै निस्कीएको खुलेको छ । उनीहरुले गेष्टहाउसमा श्रीमान-श्रीमती भनेर इन्ट्री गरेको तर प्रेमी-प्रेमिका रहेको खुलेको हो ।

मृतक युवतीको शरीरमा कुनै चोटपटक देखिएको छैन् । उनीहरुले खाएको खाना समेत प्रहरीले परिक्षणका लागि लिएको छ ।