०८४ मा देशमा एकलौटी सरकार बनाउने गरी देश दौडाहामा लाग्छौँ : रास्वपा

काठमाडौं । राष्ट्रिय स्वतन्त्र पार्टी (रास्वपा)ले इलाम निर्वाचन क्षेत्र नम्बर २ मा पराजय व्यहोर्नुपरेको कारण खोजेर ०८४ मा एकलौटी सरकार बनाउने गरी अघि बढ्ने बताएको छ । शुक्रबार साँझ पार्टी केन्द्रीय कार्यालयमा बसेको पार्टी सचिवालय बैठकले निर्वाचनको बारेमा समीक्षा गरेर अघि बढ्ने निष्कर्ष निकालेको हो ।

उपनिर्वाचनको समीक्षा गर्न पार्टी महामन्त्री डा. मुकुल ढकालको नेतृत्वमा देश जेठको दोस्रो हप्ताबाट देश दौडाहामा पठाउने निर्णय गरेको पार्टी महामन्त्री ढकालले बताए । उनले देश दौडाहाका बारेमा बुझेर पार्टी सचिवालयमा प्रतिवेदन पेश गर्ने र सोहीअनुसार निर्णय लिने पनि बताए । ‘बैठकमा हामीले निर्वाचनको बारेमा समीक्षा गरेका छौँ । समीक्षापछि कहाँनेर गल्ती भयो । हामीले नेपाली जनतामा जुन आशा गरेका थियौँ । त्यो आशा जगाउने हाम्रो आशालाई जगाइराख्न र हामीले भन्दै आएको ०८४ मा यो देशमा एकलौटी सरकार बनाउने गरी गर्नुपर्ने काम कुराहरूका बारेमा पार्टीगत रुपमा कहाँ कर कसरी कमजोरी गरेका छौँ,’ उनले भने, ‘पार्टी संगठनको अवस्था अबको दिनमा के हुने ? पार्टी संगठनको आकार, मोडल, पार्टीले लिनुपर्ने धारणाको बारेमा समग्र समीक्षा गर्न पार्टीले मलाई महामन्त्रीको रुपमा सम्पूर्ण पार्टी सदस्यहरूको भावना, सुझाव बुझ्नका लागि आगामी जेठको दोस्रो हप्ताबाट देश दौडाहामा पठाउने निर्णय गरेको छ । त्यस आधारमा पार्टी सचिवालयमा प्रतिवेदन पेश गर्ने, सोही प्रतिवेदनको आधारमा पार्टीको आगामी कार्यदिशा तय गर्ने भन्ने निर्णय भएको छ ।’

महामन्त्री डा. ढकालले सरकारमा पार्टीले गरेका कामहरूको मूल्यांकन गर्न टिम बनाउने निर्णय भएको बताए । इलामका जनताले घण्टी नबजाईकन सांकेतिक घण्टीको आवाज बजाएको निष्कर्ष पनि पार्टीले निकालेको छ । ‘सरकारको पर्फमेन्स बढाउन पार्टीका साथीहरूको टिम बनाइएको छ, त्यो टिम कन्फर्म गर्ने । सरकारमा पार्टीले गरेका कामहरूको मूल्यांकन गर्न टिम बनाउने । मन्त्रालयसँगको पार्टीको सम्बन्धलाई मजबुत बनाउने निर्णय भएको छ।’ उनले भने, ‘इलामका जनताले घण्टी नबजाईकन बजाएको जुन सांकेतिक घण्टीको आवाज सुन्नका लागि हामी तलसम्म जाँदैछाैँ । हामीले खुला पार्टी सदस्यतालाई अघि बढाएका थियौँ । नयाँ पार्टीको रुपमा खुला पार्टी सदस्यतालाई अघि बढाउनुपर्ने पनि बाध्यता थियो । अब यो यात्रापछि यसको बारेमा पनि विश्लेषण गर्दछौँ ।’