आगामी निर्वाचनमा चुनाब लड्ने विप्लवको संकेत

काठमाडौं । नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ ले आगामी २०८४ को निर्वाचन लड्ने संकेत गरेका छन् ।

गत वैशाख ५ गतेदेखि ९ गतेसम्म कपिलवस्तुमा बसेको पार्टीको केन्द्रीय कमिटीको बैठकका निर्णयहरु सार्वजनिक गर्दै विप्लवले आगामी ०८४ को निर्वाचनलार्ई समाजवादी मिसनको रुपमा प्रयोग गर्ने बताए ।

साथै उनले चुनावलाई संसदीय कोणबाट होइन समाजवाद प्राप्तको अभियानको रुपमा सञ्चालन गर्नुपर्नेमा जोड दिए ।

बैठकको निर्णय सुनाउँदै उनले २१ औं शताब्दीको विशेषता, प्रवृत्तिहरू र ज्ञानको प्रयोग गरेर चुनावलाई संघर्षको नयाँ मोर्चाको रुपमा समाजवादमा देशलाई उठाउने हिसाबमा प्रयोग गर्नुपर्ने बताए ।

उनले भने, ‘चुनावलाई अहिले केवल यो २० औं शताब्दीको संसदीय कोणबाट मात्रै हेर्नुहुँदैन । २१ औं शताब्दीको विशेषता, अहिलेका विभिन्न खालका प्रवृत्तिहरू नयाँ वर्ग, विकास भएको प्रविधि ज्ञान, विभिन्न चरित्रबाट नापेर हामीले चुनावलाई समाजवाद प्राप्तको एउटा अभियानमा बदल्न सकिन्छ । संघर्षको नयाँ मोर्चाको रुपमा समाजवादमा देशलाई उठाउनेगरि लैजानेगरि, चुनावको प्रयोग गर्नुपर्छ। संसदीय चुनावको कुरा होइन् की समाजवादको लागि एउटा समाजवादी अभियान बनाएर त्यसलाई प्रयोग गर्नुपर्छ ।’

चुनाव केवल सरकार सदनको कुरा मात्रै नभएको भन्दै यसलाई एउटा समाजवाद निर्माणको लागि अभियानात्मक ढंगले सञ्चालन गर्नुपर्ने पनि उनको भनाई छ ।

उनले नेपाली विशेषताको समाजवादका लागि चार मित्र शक्ति (कम्युनिष्ट, समाजवादी, देशभक्त र लोकतान्त्रिक गणतन्त्रवादी), चार मित्र वर्ग (किसान, मजदूर, मध्यमवर्ग र राष्ट्रिय पुँजीपतिवर्ग) ६ समुदाय खसआर्य, जनजाती, मधेसी, श्रमिक समुदाय, महिला, मुस्लिम) लाई एकतावद्ध गर्ने साथै सबैलाई मोर्चाबद्ध गर्न जोड लगाउने निर्णय पनि गरेको बताए ।