कोरियन भाषा परीक्षा ११ महिनासम्म चल्ने, यसरी हुनेछ तीन चरणमा

सोमबारदेखि सुरु भएको कोरियन भाषा परीक्षा सकिन झन्डै एक वर्ष लाग्ने भएको छ। सोमबारदेखि सुरु भएको पहिलो चरणको परीक्षा चैत २४ गते सकिनेछ।पहिलो चरणमा ४७ हजार ५१९ जनाको परीक्षा लिइनेछ।

दैनिक १ हजार जनाको दरले परीक्षा लिँदा २०८१ को पुस २ गते मात्रै परीक्षा सकिने भएको हो । ईपीएस कोरिया शाखाले तीन चरणमा गरेर परीक्षा लिनेछ।

त्यसपछि दोस्रो चरणमा ७९ हजार ९३७ जनाको परीक्षा लिइनेछ। उक्त परीक्षा २०८१ को वैशाख ३१ गतेदेखि साउन १६ गतेसम्म चल्नेछ।

तेस्रो चरणको परीक्षामा ३६ हजार १७९ जना परीक्षार्थी सहभागी हुनेछन्। त्यस्तै तेस्रो चरणको परीक्षा २०८१ को कात्तिक २६ गतेदेखि सुरु भएर २०८१ को पुस २ गतेसम्म चल्ने ईपीएस कोरिया शाखाले जनाएको छ।

ईपीएस मार्फत उत्पादनमूलक क्षेत्रमा काम गर्न कोरिया जान १ लाख ६३ हजार ६३५ जनाले आवेदन फारम भरेका छन्।

सन् २०२३ का लागि अनुमानित १५ हजार ४४८ जनालाई कोरियाको उत्पादनमूलक क्षेत्रमा लैजान भन्दै दरखास्त आह्वान गरिएको थियो ।