‘सकिमना पुन्ही’ : अन्नपातबाट मठमन्दिर र देवताकोे आकृति बनाएर मनाइने पर्व

भादगाउँ । कात्तिक शुक्ल पूर्णिमाको अवसरमा आज नेवार समुदायले घरघरमा पिँडालु र सख्खरखण्ड उसिनेर खाँदै ‘सकिमना पुन्ही’ अर्थात पिँडालु उसिन्ने पूर्णिमा मनाउँदैछन् ।

यो पुन्ही नेवार समुदायका भजन खलः, दाफा भजन खलःहरुले पर्वको रुपमा मनाउने गर्दछन् । कोजाग्रत पूर्णिमाको दिन सुरु गरिएको एक महिने रात्रिकालीन भजनकीर्तनलाई समापन गर्ने दिनको रुपमा आज पिँडालु उसिनेर खाने र नसाः (मकै, भटमास, गहुँ र ताय) बाट भगवानका आकृति बनाइ त्यसलाई प्रसादको रुपमा बाँड्ने प्रचलन रहेको इतिहास तथा संस्कृतिविद प्रा डा पुरुषोत्तमलोचन श्रेष्ठले बताए ।

यस दिन नेवार समुदायमा आ–आफ्नो टोलमा रहेका दाफा भजन खलःले नसाःबाट मठमन्दिर तथा भगमानको आकृति बनाउँछन् । आकृति बनाउँदा गहुँ विछ्याएर ताय (धानको बाला) र कालो भटमासले भगमानको स्वरूप बनाइने उनले बताए ।

‘उक्त स्वरूपलाई चारैतिर भुटेको मकैले घेरा बनाउँछन् र त्यसमाथि पुरी र माल्पुवाले घेरेर फुलको मालाले शुङ्गारपटार गरी दक्षिणा चढाइ दियो बालेर भजनकीर्तन गाउने गर्छन्’, श्रेष्ठले भने ।

कोजाग्रत पूर्णिमाको दिनदेखि दैनिक रुपमा हुने भजनकीर्तन आज समापन हुने भएकाले नेवार समुदायका प्रत्येक घरमा एक/एक जना व्रत बसी विभिन्न ठाउँका नारायण र महादेव मन्दिरमा गई पूजा गर्दछन् ।

पूजामा माल्पुवा, पुरी, नसाः, गाईको दूधले बनेको खिर, सुन्तला, बदाम, उसिनेको पिँडालु र सख्खरखण्डलगायत परिकार टोलका देवीदेवता, महादेव र नारायणलाई प्रसादका रुपमा चढाउने परम्परा रहेको श्रेष्ठले बताए ।

‘यसरी पूजा चढाउँदा प्रसादका रुपमा मन्दिरबाट नसाः लिएर आउने गर्छन्’, उनले भने, ‘साँझ चन्द्रमा उदाएपछि चन्द्रमा र तुलसीलाई गाईको दूधको अध्र्य दिई विधिवत रुपमा पूजा गरी प्रसाद चढाएर पूजा सम्पन्न गरिन्छ ।’

मन्दिरबाट ल्याइएको प्रसादस्वरुप नसाः राखेर घरका सबै सदस्यलाई पिँडालु, सखरखण्ड, माल्पुवा र पुरी प्रसाद दिई आषिश लिएर भोजन गर्ने परम्परा रहको छ । ऋतु अनुसारको भोजन भगवानलाई चढाएर मात्र खाने पर्वको रुपमा सकिमना पुन्हीलाई लिने गरिएको संस्कृतिविद प्रा.डा श्रेष्ठको भनाइ थियो ।

आज विषेशगरी नारायणको पुजाआराधना गरिने हुनाले नेपाल संवत्को बाह्र महिनाको पहिलो पुन्हीमा भगवान् नारायणलगायत महादेव र आफ्नो इष्टदेवतालाई प्रसाद चढाएर खानाले पुण्य प्राप्तिका साथै शारीरिक शक्ति प्राप्त हुने धार्मिक विश्वास रहेको छ ।

वर्षभरिको बाह्रवटा महिनाको प्रत्येक पुन्हीमा भगवानलाई फरक–फरक भोजन प्रसादको रुपमा चढाइने नेवार समुदायको संस्कार र संस्कृति अनुसार कार्त्तिक शुक्ल पुन्हीको दिन कण्दमूल, खिर र नसाःलाई प्रसादको रुपमा चढाइने संस्कृतिकर्मी बताउँछन् ।

नेवार समुदायले ऋतु अनुसारको उब्जनी भएका अन्न पहिला आफ्नो ईष्ट देवतालाई चढाएर मात्र खाने प्रचलन अनुसार आजको दिन पिँडालु, सख्खर खण्ड, नसाः लगायतका भोजन चढाएर मात्रै खाने प्रचलन रहेको श्रेष्ठले बताए ।

यसले शरीरमा ताकत दिनुका साथै शरीर स्वस्थ हुने जनविश्वास रहेको उनको भनाइ थियो ।

अन्नपातबाट बनाइएका भगमानको आकृतिबाटै मठमन्दिर तथा मूर्तिको विकास भएको पुरोहित एवं संस्कृतिकर्मी हरिशरण राजोपाध्यायले बताए । उनका अनुसार आदिमकालमा मानिसले अन्नपात उत्पादन गर्न नजानेको समयमा कण्दमूललाई सबै भन्दा पहिलो भोजनका रुपमा ग्रहण गरेका थिए ।

‘पछि मानिसले अन्नबाट विभिन्न मठमन्दिर र भगमानको आकृति कोरेपछि बिस्तारै यसको विकसित रुपमा विभिन्न मठमन्दिरको निर्माण हुन थाल्यो’, पुरोहित राजोपाध्यायले भने, ‘त्यसको स्वरूप सकिमना पुन्हीका दिन नसाःमा भगमानको आकृति बनाएर पूजा गरी कण्डमूललाई प्रसादका रुपमा चढाएर खाने प्रचलन थालेको हो ।’

उनका अनुसार नसाःलाई सकिमना पुन्हीको दिनमा मात्र नभई गणेश चतुर्थीका दिनमा पनि प्रसादको रुपमा चढाइ विधिवत् रुपमा पूजा गर्ने परम्परा रहेको छ ।

साथै गुफा राख्दा गुफा बसेका बालिकालाई सूर्यसँग विवाह गर्ने क्रममा पनि प्रसादस्वरुप नसाः खुवाउन जाने परम्परा रहेको पुरोहित राजोपाध्यायले बताए ।

नेवार समुदायमा जन्म दिनको अवसरमा भुटेको मकै, गहुँ, भटमासलगायतको सम्मिश्रणबाट बनाइएको नसाः दान गर्ने प्रचलन रहेको उनको भनाइ थियो ।