कोशी सरकारलाई दिएको समर्थन कायम राख्ने एमालेको निर्णय
मकालु खबर
काठमाडौँ । नेकपा एमालेले कोशी प्रदेश सरकारलाई दिएको समर्थन कायम राख्ने भएको छ ।
मुख्यमन्त्री केदार कार्कीले माओवादी केन्द्र र एकीकृत समाजवादीलाई सरकारमा सहभागी गराएपछि सरकारबाट बाहिरिएको एमालेले समर्थन भने फिर्ता नलिने निर्णय गरेको हो।
सरकार विस्तार भए लगतै एमालेका मन्त्री राम रानाले शनिवार राजीनामा दिएका थिए। तर सोमबार बिहान बसेको संसदीय दलको बैठकले तत्कालका लागि समर्थन फिर्ता नलिने निर्णय गरेको प्रमुख सचेतक रेवतीरमण भण्डारीले जानकारी दिए।
यस्तै एमालेले सोमबार कार्यसूचीमा रहेको बजेटसम्बन्धी अध्यादेश स्वीकृत गर्न सहयोग गर्ने भएको छ।
संसदमा सोमबारदेखि नै प्रमुख प्रतिपक्षमा बस्ने एमाले प्रमुख सचेतक भण्डारीले बताए।
कोशीमा कांग्रेस सांसद कार्की एमालेकै समर्थनमा मुख्यमन्त्री नियुक्त भएका थिए। कांग्रेसले माओवादीका इन्द्र आङ्बकोलाई मुख्यमन्त्रीमा समर्थन गरेपनि कांग्रेसका असन्तुष्ट समूह र एमालेको समर्थनमा बहुमत जुटाएर कार्की गत असोज २६ गते मुख्यमन्त्री नियुक्त भएका थिए।
२७ गते सपथ गरेका कार्कीले पहिलो चरणमै एमालेबाट रानालाई मन्त्री नियुक्त गरेका थिए। मन्त्री भएको १५ दिनबित्दा पनि कुनै जिम्मेवारी भने दिएका थिएनन्। केन्द्रीय गठबन्धनमा रहेका दलका दुई मन्त्री नियुक्त गरेसँगै कोशीमा एमाले सरकारबाट बाहिरिएको थियो।
मकालु खबर
