माफियाकरण गर्ने शिक्षा विधेयक खारेज हुनुपर्छ : धर्मेन्द्र बास्तोला

काठमाडौं । क्रान्तिकारी कम्युनिस्ट पार्टीले शिक्षकहरूले गरिरहेको आन्दोलनमा ऐक्यबद्धता जनाएको छ । शुक्रवार राजधानीको संवाद डबलीमा पत्रकार सम्मेलन गरी सरकारले विधेयकमार्फत शिक्षा निरङ्कुशता ल्याउने र त्यसमा संस्थागतरुपले थप व्यापारीकरण तथा माफियाकरण बढुवा दिएको आरोप लगाएको छ ।

सो पार्टीका प्रवक्ता धर्मेन्द्र बास्तोला‘कञ्चन’ले शिक्षकहरूले गरिरहेको राजधानी केन्द्रित आन्दोलनलाई थप सशक्त बनाउनु पर्ने र त्यसमा आफ्नो पार्टीले पूर्णरुपमा साथ दिने बताएका छन् ।

‘नेपालमा शिक्षा र स्वास्थ्य जस्तो मानिसको मौलिक अधिकारमाथि व्यापारीकरण गर्ने अपराध राज्यले गरेको छ । त्यसको अन्त्य गर्नुपर्छ । यो शिक्षा विधेयकले शिक्षालाई घुमाउरो तरिकाले व्यापारिकरणलाई संस्थागत गरेको छ । ’ सरकारले शिक्षामा परिवर्तन ल्याउन खोजे जस्तो गरेर जनतामा भ्रम मात्रै छरेको टिप्पणी गरे ।

‘शिक्षा प्रणाली परिवर्तन गनुपर्ने लामो समयदेखिको मागलाई सरकारले शिक्षा विधेयक ल्याएर शिक्षा प्रणालीमा परिवर्तन दिन खोजेको एउटा भ्रम दिन खोजेको छ । तर जुन विधेयक छ त्यो भित्र कुनै पनि परिवर्तन छैन । सामान्य परिवर्तन होला तर आधारभूत रूपमा परिवर्तन छैन तर भ्रम दिने कोसिस भने भएको छ । ’

सरकारले षड्यन्त्रपूर्ण तरिकाले शिक्षकहरूको माग पूरा नगरी गुमराहमा पार्न खोजेको आरोप लगाए ।

उनले भने ‘फेरि शिक्षकहरूमाथि जुन प्रकारको प्रताडना हिजो चल्दै आएको थियो त्यसलाई निरन्तरता दिने र शिक्षामाथि जुन प्रकारको लुट, व्यापारीकरण, माफियाकरण चल्दै आएको छ, त्यसलाई निरन्तरता दिने शैलीमा कामहरू गर्दै आइरहेको छ ।’

बास्तोलाले ज्यालादारी,करार,अस्थायी गरेर पेन्सन पाउनेबेलासम्म काम गर्दा पनि उनीहरूलाई न स्थायी न सञ्चयकोषको व्यवस्था भएको छ उनीहरू सबैलाई राज्यले समान व्यवहार गरेर सुविधा दिनु पर्ने माग पनि गरेका छन् ।

शिक्षकहरूको आन्दोलनमा समर्थनका क्रममा गिरफ्तार भएका भातृ सङ्गठन अखिल (क्रान्तिकारी)का वसन्त वोगटी,शारदा महत, इन्दिरा अधिकारी,सुनिता बुढाथोकी,मन्जिल बोगटी, युवराज थापा,रोशन कार्की,अर्जुन बोगटी लगायतलाई अविलम्ब रिहा गर्न माग समेत गरेका छन् । त्यसै गरी सिंहदरबार पश्चिम गेट परिसरमा शान्तिपूर्ण विरोध गरिरहेका विद्यार्थी नेताहरू हरिकृष्ण गजुरेल, मिलन राई, पेशल दाहाल, प्रभात भट्टराई, वीरेन्द्र शाह, रुपा बुढा, मीन एडी, राजन राउत, गोविन्द विष्ट, स्मृति कार्की, सर्जन पाण्डे, लक्ष्मी पाण्डे, मिलन बुढा, स्तालिन बस्नेत, रोशन यादव, लक्ष्मण बम, समीर वि।क। लगायतका विद्यार्थीहरूलाई प्रहरीले गिरफ्तार गरेको जनाउँदै उनीहरूलाई पनि निशर्त रिहाई नगरे थप आन्दोलनको चेतावनी दिएका छन् ।

पत्रकार सम्मेलनमा अखिल नेपाल शिक्षक सङ्गठनका फ्याक्सन इन्चार्ज लालबहादुर बिसी, बागमती प्रदेश संयोजक लगायतको उपस्थिति रहेको थियो ।