बैतडीमा पहिलोपटक ‘क्यासलेस’ सेवा सञ्चालनमा

काठमाडौँ । बैतडीमा पहिलोपटक विद्युतीय भुक्तानी ‘क्यास लेस’सेवा शुरू भएको छ ।

‘क्यास लेस’को अवधारणा अन्तर्गत दशरथचन्द नगरपालिकाले विद्युतीय भुक्तानी शुरू भएको हो । स्थानीय सञ्चित कोष व्यवस्थापन प्रणाली (सुत्र)मार्फत् भुक्तानी प्रणालीको सुरुआत तथा विद्युतीय भुक्तानी गर्ने बैतडीको पहिलो पालिका बनेको नगरपालिकाका लेखापाल रामबहादुर चन्दले जानकारी दिए ।

यस्तै, बैतडीमा विद्युतीय भुक्तानी गर्न पहिलो भएको दशरथचन्द नगरपालिका सिंगो सुदूरपश्चिम प्रदेशमा सातौं स्थानीय तहसमेत बनेको छ । उनले भने, “विद्युतीय भुक्तानी प्रणाली शुरू भएपछि अब सेवाग्राहीलाई समेत सजिलो हुन्छ । चेकमार्फत् कारोबार झन्झटिलो हुँदै आएकोमा अब त्यसो हुने छैन ।”

अब नगरपालिकाले भुक्तानी गर्नुपर्ने रकम सिधै भुक्तानी लिनेको खातामा जम्मा हुने जनाइएको छ । महालेखा नियन्त्रक कार्यालयले आगामी साउन १ गतेदेखि सबै स्थानीय तहहरूलाई विद्युतीय भुक्तानी प्रणालीमा जान निर्देश गरिसकेकोमा दशरथचन्दले असारमै विद्युतीय भुक्तानी शुरू गरेको हो ।

सुत्र प्रणालीका आधारमा विद्युतीय भुक्तानी गर्ने विषयमा कोष तथा लेखानियन्त्रण कार्यालयले जिल्लाका स्थानीय तहका लेखापाललाई तीन दिने तालिमसमेत दिएको थियो । विद्युतीय भुक्तानी शुरू भएसँगै उपभोक्ताले अब भुक्तानीका लागि चेक लिनुपर्ने बाध्यताको पनि अन्त्य भएको लेखा अधिकृत उद्धवदेव भट्टले बताए ।

उनले भने, “विद्युतीय प्रणालीमार्फत हुने भुक्तानीले सेवा सहजताका साथै सुशासन कायम गर्न सहयोग मिल्छ । अब चेकमा त्रुटि हुने, हस्ताक्षर नमिल्ने तथा चेक लिनकै लागि नगरपालिका धाउनुपर्ने समस्याको समेत अन्त्य भएको छ ।” विद्युतीय भुक्तानी प्रणालीले सुशासन, वित्तीय अनुशासन र उत्तरदायित्व कायम गर्न सघाउ पुग्ने दशरथचन्द नगरपालिका प्रमुख पुस्करराज जोशीले बताए ।

छिटोछरितो, भरपर्दो र विश्वनीय लेखाङ्कन र प्रतिवेदनका लागि सुत्रको महत्त्वपूर्ण योगदान रहेको जोशीको भनाइ छ । उनले भने, “सुत्र प्रणालीले स्थानीय तहमा पारदर्शीता कायम गर्न सहयोग गर्नेछ । चेकबाट हुने कारोबारको तुलनामा विद्युतीय कारोबार छिटो छरितो हुनुका साथै प्रक्रियागत झन्झट कम गरि कम जनशक्तिबाट प्रभावकारी काम गर्न सकिनेछ ।”

प्रतिक्रिया

Leave a Reply

Your email address will not be published.