अर्थमन्त्रीमाथि छानबिनकाे माग गर्दै एमालेले गर्याे संसद अवरुद्ध
मकालु खबर
काठमाडौँ । नेकपा एमालेले बजेट निर्माणमा अनधिकृत व्यक्तिको संलग्नताका विषयमा छानबिन गर्न संसदीय समिति गठनको माग गर्दै प्रतिनिधिसभा बैठक अवरुद्ध गरेको छ ।
प्रतिनिधिसभाको मंगलबारको बैठकमा अर्थमन्त्री जनार्दन शर्माको स्पष्टीकरण चित्त नबुझेपछि एमालेले यस विषयमा संसदीय समिति गठनको माग गरेको हो । बैठकमा एमालेका प्रमुख सचेतक विशाल भट्टराईले अर्थमन्त्री शर्मामाथि छानबिन समितिको माग गर्दै संसदीय समिति गठन नभएसम्म संसद् चल्न नसक्ने बताए ।
विभिन्न व्यापारिक घरानालाई फाइदा हुने गरी करको दर हेरफेर भएको आरोप उनले लगाए । उनले कर निर्धारणमा अनधिकृत व्यक्ति प्रवेश गर्नु राष्ट्रघात र ठूलो वित्तीय अपराध भएको जिकिर गरे ।
त्यसअघि बैठकमा अर्थमन्त्री शर्माले बजेट तथा आर्थिक विधेयक तर्जुमा प्रक्रिया अन्तर्गत नै रहेर बनाइएको दाबी गरेका थिए । उनले अर्थसचिव र राजस्व सचिवको नेतृत्व र मातहतमा अन्य विभागीय प्रमुख कर्मचारीको तहमा विभिन्न स्तरमा छलफल भएर, सरोकारवालाबाट आएका सुझाव समेतलाई ध्यान दिएर प्रस्ताव बन्ने गरेको जिकिर गरे ।
अर्थमन्त्री शर्माले बजेट निर्माण गर्दा राजस्वका दर चलाउन रातको १२ बजे कोही व्यक्ति आएको भन्दै भ्रामक र झुटो कथा बनाइएको तर्क गरे ।
अर्थमन्त्रीको जवाफपछि एमालेका सांसदहरूले यस विषयमा छानबिन गर्नुपर्ने माग गरेका थिए । बैठकमा सभामुख अग्निप्रसाद सापकोटाले मन्त्रीले सार्वजनिक महत्त्वको वक्तव्य दिएपछि संसद् चल्न दिन आग्रह गरेपनि एमालेका सांसदहरूले उठेर विरोध गरेका थिए । एमालेको विरोधपछि प्रतिनिधिसभा बैठक बुधवार बिहान ११ बजेसम्मका लागि स्थगित गरिएको छ ।
मकालु खबर
