५ हजार मत गणना बाँकी हुँदै विराटनगरको मेयरमा कोइराला र उपमेयरमा कार्कीको विजय पक्का

विराटनगर । विराटनगर महानगरपालिकाको करिब ५ हजार मत गणना नसकिँदै मेयर उपमेयर दुवै पदका लागि विजयीको टुंगो लागिसकेको छ।

अन्तिम मतपरिणाम सार्वजनिकभई नसक्दै विराटनगर महानगर मेयरका उम्मेदवार नेपाली कांग्रेसका नागेश कोइराला र उपमेयरकी उम्मेदवार नेकपा एमालेकी शिल्पा निराला कार्कीले चुनाव जित्ने पक्कापक्की भएको हो।

मुख्य निर्वाचन अधिकृतको कार्यालयले सार्वजनिक गरेको पछिल्लो मतपरिणाम अनुसार मेयरमा कोइरालाले २७७०५ मत ल्याउँदा उनको प्रतिस्पर्धी नेकपा एमालेका सागर कुमार थापाले २०३६५ मात्र मत ल्याउँदा कोइरालाले स्वतः जित निकालिसकेका छन्।

त्यस्तै, उपप्रमुखमा एमालेकी शिल्पाले २४०१५ मत ल्याउँदा उनको प्रतिस्पर्धी जसपाका अमरेन्द्र यादवले १३४७३ मत मात्र ल्याए। यी दुवै उम्मेदवारको मतान्तर भन्दा कम मत गणना बाँकी रहेको कारण कोइराला र कार्कीले विराटनगरको मेयर र उपमेयर जितेका छन्।

जम्मा ८९७८९ मत खसेकोमा करिब ५ हजार मत गणना बाँकी छँदै कांग्रेसका नागेश कोइराला र एमालेकी शिल्पा कार्कीले विराटनगर महानगरपालिकाको मेयर र उपमेयरको चुनाव जितेका हुन्। उनीहरू निर्वाचित भएको घोषणा गर्न मात्र बाँकी रहेको छ।

विराटनगर महानगरपालिकाका सहायक निर्वाचन अधिकृत हेमबहादुर बुढाथोकीले अन्तिम परिरणाम आउन करिब १ बज्ने बताएका छन्। खोल्नु पर्ने मत पाटीका बाँकी नरहेकोले ढिलोेमा १ बजेसम्ममा सकिने उनले जानकारी दिए।