महासचिव पुरीद्वारा माओवादी प्रचार विभाग सदस्य अस्वीकार

काठमाडौँ । नेपाल पत्रकार महासंघका महासचिव रोशन पुरीले नेकपा (माओवादी केन्द्र) ले आफूलाई पार्टीको प्रचार तथा प्रकाशन विभागको सदस्य बनाएकोप्रति विरोध जनाएका छन् । आफूलाई नसोधिकन सदस्यमा राखिएको भन्दै महासचिव पुरीले सदस्य अस्वीकार गरेका हुन् ।

बुधबार पार्टी अध्यक्ष पुष्पकमल दाहाल ‘प्रचण्ड’ ले जारी गरेको आन्तरिक सर्कुलरको प्रचार तथा प्रकाशन विभागमा पुरीको नाम २८ नं.मा राखिएको छ । यसपछि आफ्नो ध्यानाकर्षण भएको जनाउँदै पुरीले आफू पत्रकार महासंघको महासचिव रहेसम्म पार्टीको प्रचार-प्रसारको काममा नरहेने बताएका छन् ।

आफूलाई नसोधिकन सदस्य बनाएकोप्रति असहमति जनाउँदै पुरीले आफ्नो आधिकारिक फेसबूकमार्फत भनेका छन्, ‘नेपाल पत्रकार महासंघको महासचिव रहेसम्म पार्टीको प्रचार विभाग वा पार्टीका अन्य निकायमा नरहने कुरा जानकारी गराउँदछु ।’