सिक्किममा आजदेखि विदेशी पर्यटकलाई प्रवेश निषेध

काठमाडौँ । कोरोना भाइरसको नयाँ भेरिएन्ट ओमिक्रोनको जोखिम बढेको भन्दै सिक्किम सरकारले आजदेखि विदेशी पर्यटकलाई प्रवेशमा रोक  लगाएको छ । आज (बुधबार) बिहान ६ बजेदेखि लागू हुने गरी डिसेम्बर १५ सम्म विदेशी पर्यटक प्रवेशमा प्रतिबन्ध लगाएको हो।

ओमिक्रोनको सङ्क्रमण राज्यमा छिर्न नदिन विदेशी पर्यटकलाई प्रतिबन्ध लगाएको सिक्किम सरकारले जनाएको छ । मंगलबार राज्यको गृह विभागले एक सूचनामार्फत  सिक्किम आउने विदेशी पर्यटकलाई अनुमति जारी नगर्ने बताएको हो ।

विभागले पर्यटन विभागलाई पत्राचार गर्दै सिक्किम घुम्न आउने कुनै पनि विदेशी पर्यटकलाई प्रवेश नदिन र कुनै पनि पर्मिट जारी नगर्न आदेश दिएको हो। सिक्किम सरकारले राज्यमा प्रवेशका लागि बनाएका अन्य नियम यथावत् राखेको छन्। यसरी विदेशी पर्यटकलाई प्रवेशमा रोक लगाउने सिक्किम भारतको पहिलो राज्य हो।