कोरोनाका कारण अमेरिकाका एक लाख ४० हजार बच्चा अभिभावकविहीन
मकालु खबर
वासिंटन । कोरोना भाइरसको महामारीका कारण अमेरिकामा एक लाख ४० हजारभन्दा बढी बालबालिका अभिभावकविहीन भएका छन् ।
‘बिजनेस इन्साइडर’ले तयार पारेको प्रतिवेदनमा महामारीका कारण बालबालिकाको जीवनमा दीर्घकालीन असर परेको उल्लेख गरिएको छ ।
सो प्रतिवेदनअनुसार देशका हरेक ५०० मध्ये एक जना अभिभावकविहीन हुनुपरेको देखिएको छ । अभिभावकविहीन भएपछि बालबालिकाहरूले मनोवैज्ञानिक तथा आर्थिक समस्या भोग्नुपरेको अधिकारीहरूले जनाएका छन् ।
अभिभावक गुमाएका बालबालिकाहरूमध्ये धेरै बालबालिकाहरू अल्पसङ्ख्यक तथा सानो समुदायका धेरै रहेको पाइएको छ । कोरोनाको महामारीबाट अत्यधिक प्रभावित देशको अग्रसूचीमा अमेरिका पर्दछ । कोरोनाका कारण मृत्यु भएका, सङ्क्रमित भएका र अहिले पनि सङ्क्रमित अवस्थामै रहेकाहरूको सङ्ख्या अमेरिकामै सबैभन्दा धेरै रहेको छ ।
कोरोना भाइरसका कारण अमेरिकामा अहिलेसम्म सात लाख ६४ हजारभन्दा बढीको मृत्यु भएको अधिकारीहरूले जनाएका छन् ।
– रासस
मकालु खबर
