पत्रकारद्वय मारिया रेसा र दिमित्री मुराटोभलाई नोबेल शान्ति पुरस्कार

काठमाडौँ । यस वर्षको नोबेल शान्ति पुरस्कार फिलिपिन्सकी पत्रकार मारिया रेसा र रुसका पत्रकार दिमित्री मुराटोभलाई प्रदान गरिएको छ। अभिव्यक्ति स्वतन्त्रताको पक्षमा गरेको योगदानलाई कदर गर्दै उक्त पुरस्कार पत्रकारद्वयलाई प्रदान गरिएको हो ।

नर्वेको नोबेल समितिका अध्यक्ष बेरिट रीस-एन्डरसनले भने, ‘यो अभिव्यक्ति स्वतन्त्रताको रक्षाका लागि उनीहरूले गरेको प्रयासको सम्मान हो‚ जो लोकतन्त्र र स्थायी शान्तिका लागि एक अनिवार्य शर्त पनि हो।’

अध्यक्ष बेरिटले भने‚ ‘उनीहरू सबै पत्रकारहरूका प्रतिनिधि हुन्‚ जो यो आदर्शको पक्षमा उभिएर संसारमा लोकतन्त्र र प्रेस स्वतन्त्रतामा बढ्दो प्रतिकूल परिस्थितिको सामना गरेका छन् ।’

सन् २०१२ मा रेस्साले खोजपत्रकारिताका निम्ति र्‍याप्लर नामक डिजिटल मिडिया खोलेकी थिइन्‚ जसको प्रमुखको रूपमा हालसम्म उनी कार्यरत छिन् । उक्त मिडिया दुतेर्ते शासनको विवादास्पद, हत्यारा र लागुऔषध विरोधी अभियानमा आलोचनात्मक रूपले सबैको ध्यान केन्द्रित गर्न सफल भएको छ ।

त्यसैगरी मुराटोभले यसबीचमा रूसमा दशकौँदेखि बढ्दो चुनौतीपूर्ण परिस्थितिमा अभिव्यक्ति स्वतन्त्रताको रक्षाका निम्ति लामो सङ्घर्ष गरेका छन् । सन् १९९३ मा उनी स्वतन्त्र अखबार नोवाया गजेटाका संस्थापक मध्येका एक थिए र उनको सत्ता र शक्तिप्रति मौलिक आलोचनात्मक दृष्टिकोण रहेको समितिले जनाएको छ ।

उनी १९९५ देखि यसको मुख्य सम्पादक रहेका छन् । समितिका अध्यक्ष रीस-एन्डरसनले अभिव्यक्ति स्वतन्त्रता र प्रेस स्वतन्त्रताबिना देशहरूबीच भाइचाराको सम्बन्ध, निशस्त्रीकरण र समुन्नत विश्वको निर्माण गर्न नसकिने जनाएका छन् ।

प्रतिक्रिया

Leave a Reply

Your email address will not be published. Required fields are marked *