४५ सालको भूकम्पको सम्झना : यस्तो थियो न्यूयोर्क टाइम्सको समाचार
मकालु खबर
काठमाडौं । विसं २०४५ भदौ ५ गते नेपालमा शक्तिशाली भूकम्प गयो । ६.९ रेक्टर स्केलको त्यो भूकम्पले नेपालको पूर्वी क्षेत्रका साथै उत्तरी बिहारलाई धेरै नै प्रभावित बनायो । करिब ७ सय नेपालीको ज्यान गएको भूकम्पले धरानमा धेरै नोक्सानी पुर्याएको थियो । उदयपुर केन्द्र बनाएर गएको भूकम्पताका नेपालका प्रधानमन्त्री मरिचमान सिंह श्रेष्ठ थिए । राजा वीरेन्द्र थिए ।
अहिलेजस्तो सूचनाको राम्रो प्रभाव नभएको जमाना थियो । अनलाइनको जमाना त छँदै थिएन । यस्तो अवस्थामा पनि नेपालको भूकम्पको समाचार दि न्यू योर्क टाइम्सको पहिलो पृष्ठमा आएको थियो । भक्तपुरको भत्किएको एक घरको तस्बिरसहित समाचार आएको थियो ।
यस्तो थियो समाचारः—
बिहान ४ बजे आएको भूकम्पको कम्पन ४५ सेकेन्ड चलेको भन्दै समाचारमा तत्कालीन समयमा भारतमा ४५० र नेपालमा २५२ जनाको ज्यान गएको लेखिएको छ । भदौ ६ गतेको न्यूयोर्क टाइम्स अखबारमा नेपालको गृह मन्त्रालयको सूचनालाई लिएर समाचार बनाइएको छ ।
समाचारमा धरानलाई शहर नभनेर जिल्ला भन्दै १५० जनाको ज्यान गएको उल्लेख गरिएको छ । नेपालमा रानीकी आमाको जन्मोत्सव रद्द गरिएको र बिहारका भूकम्प पीडित क्षेत्रमा तत्कालीन भारतीय प्रधानमन्त्री राजीव गान्धीले भ्रमण गर्ने तय भएको समाचारमा लेखिएको छ ।
भारतमा १० हजारभन्दा धेरै र नेपालमा १ हजार भन्दा धेरै घाइते भएको समाचारमा उल्लेख गरिएको छ । त्यो समाचार भारतको राजधानी दिल्लीबाट सञ्जय हजारिकाले लेखेका थिए । भक्तपुरको भूकम्पले क्षतिग्रस्त भवनको तस्बिर भने बेलायती समाचार एजेन्सी रोयटर्सबाट साभार गरिएको छ ।
तर, फोटोपत्रकार को थिए भनेर खुलाइएको छैन ।
मकालु खबर
