पाँच दिनदेखि हराइरहेकी बालिकाको शव इनारमा फेला
जनकपुरधाम । विगत पाँच दिनदेखि हराइरहेकी धनुषाकी एक बालिकाको शव इनारमा फेला परेको छ । जिल्लाको गणेशमान चारनाथ नगरपालिका-१० बरमझियाका विरेन्द्र कुमार यादवकी ६ वर्षीया छोरी प्रिती यादवको शव शुक्रबार इनारमा फेला परेको हो ।
गतसाउन ११ देखि बेपत्ता बालिकाको निरन्तरको खोजीपछि शुक्रबार बिहान घर नजिकैको इनारमा तैरिरहेको अवस्थामा मृत अवस्थामा प्रितीको शव भेटिएको धनुषा प्रहरीले जनाएको छ ।
बालिका इनारमा खसेको नभई कसैले हत्या गरेर इनारमा फ्याँकेको परिवारजनको आरोप छ । शवको प्रकृति हेर्दा कसैले हत्या नै गरेको मृतकका बाबु विरेन्द्रको भनाइ छ ।
शव पोष्टमार्टमका लागि प्रादेशिक अस्पताल जनकपुर पठाइएको छ । पोष्टमार्टम रिपोर्ट आएपछि मात्रै घटनाबारे केही भन्न सकिने धनुषाका प्रहरी प्रमुख प्रकाश रानाभाटले बताए ।
बच्चाको हत्या नै भएको भन्दै न्यायको माग गर्दै मृतकका आफन्त तथा परिवारजनले केही समय सडक अवरुद्ध पारेका थिए ।